హైదరాబాద్ పూల మార్కెట్లలో దీపావళి రద్దీ.. లక్ష్మీ పూజకు పూలకు భారీ డిమాండ్

హైదరాబాద్‌లో దీపావళి పండుగ నేపథ్యంలో పూల మార్కెట్లలో కొనుగోలుదారుల రద్దీ పెరిగింది. లక్ష్మీ పూజ కోసం పూలు కొనేందుకు ప్రజలు మార్కెట్లకు తరలివస్తున్నారు. నగరంలోని ప్రధాన పూల మార్కెట్లలో మొజాంజాహి మార్కెట్ ఒకటి.

గుడిమల్కాపూర్ తర్వాత నగరంలో పెద్ద పూల మార్కెట్‌గా మొజాంజాహి మార్కెట్ ఉంది. ఇక్కడికి ఈరోజు పెద్ద మొత్తంలో పూలు వచ్చాయి. గులాబీ, చామంతి, బంతి సహా పలు రకాల పూలు అందుబాటులో ఉన్నాయి.

నగరంలోని వివిధ ప్రాంతాల్లో పూలు అమ్మే చిరు వ్యాపారులు ఇక్కడి నుంచి బల్క్‌గా పూలు కొనుగోలు చేస్తున్నారు. ఇళ్లలో, ఆఫీసుల్లో పూజలు నిర్వహించేవారు కూడా నేరుగా మార్కెట్‌కు వచ్చి పూలు కొంటున్నారు.

తెలంగాణలో పూల ఉత్పత్తి తక్కువగా ఉండటంతో ఎక్కువ పూలు మహారాష్ట్ర నుంచి వస్తున్నాయని వ్యాపారులు చెప్పారు. నాణ్యతను బట్టి బంతి పువ్వు ₹50 నుంచి ₹80 వరకు అమ్ముడవుతోంది. చామంతి ధర ₹100 నుంచి ₹180 వరకు ఉంది. గులాబీ ధర కొద్దిగా పెరిగింది.

దసరా సమయంలో తొమ్మిది రోజుల నవరాత్రులు జరుగుతాయి. దీపావళి ఒకటి లేదా రెండు రోజులే ఉంటుంది. ఆ కారణంగా ఈరోజు రద్దీ కొంత తక్కువగా ఉంది. దీపావళి రోజు కొనుగోలుదారులు ఎక్కువగా వస్తారని, ధరలు కొద్దిగా పెరగొచ్చని వ్యాపారులు ఆశాభావం వ్యక్తం చేస్తున్నారు.