హైదరాబాద్‌లో వినాయక నిమజ్జనం: ఖైరతాబాద్ గణేష్ ఊరేగింపు, బాలాపూర్ లడ్డు వేలంపాట

హైదరాబాద్‌లో వినాయక నిమజ్జనం నేపథ్యంలో ఖైరతాబాద్ గణేష్ ఊరేగింపు జరగనుంది. పోలీసులు 10 వేల సీసీ కెమెరాలు, 24 డ్రోన్లతో నిఘా ఏర్పాటు చేశారు.

తెలుగు తల్లి ఫ్లైఓవర్, సచివాలయం పరిసరాలు, నెక్లెస్ రోడ్, ఖైరతాబాద్ వైపు వెళ్లే మార్గాల్లో ట్రాఫిక్ ఆంక్షలు విధించారు. డీజేలు, సౌండ్ మిక్సర్లు, బాణాసంచాపై నిబంధనలు అమలు చేశారు.

బాలాపూర్ గణేష్ మండపంలో ప్రత్యేక పూజలు ముగిశాయి. శోభాయాత్ర అనంతరం బొడ్రాయి వద్దకు చేరుకుంటారు. అక్కడ ఉదయం 9.30 గంటలకు లడ్డు వేలంపాట జరుగుతుంది.

బాలాపూర్ లడ్డు వేలంపాట 1994లో ₹450తో మొదలైంది. గత సంవత్సరం ఈ లడ్డు ₹35 లక్షలకు వేలం పలికింది. ఈసారి ఎవరు ఎంతకు దక్కించుకుంటారన్నది ఆసక్తిగా మారింది.

ఖైరతాబాద్ గణేష్ ఊరేగింపు కాసేపట్లో ప్రారంభం కానుంది. భక్తులు పెద్ద సంఖ్యలో హుసేన్ సాగర్ వైపు చేరుకుంటున్నారు.