గ్లోబల్ సమ్మిట్ డిసెంబర్ 9-11న హైదరాబాద్ స్కిల్ యూనివర్సిటీలో

హైదరాబాద్‌లో డిసెంబర్ 9 నుంచి 11 వరకు జరగనున్న గ్లోబల్ సమ్మిట్‌ను స్కిల్ యూనివర్సిటీలోనే నిర్వహిస్తామని మంత్రి వివేక్ వెంకటస్వామి తెలిపారు. సమ్మిట్ ఏర్పాట్ల నేపథ్యంలో ఆయన స్కిల్ యూనివర్సిటీ నిర్మాణ పనులను పరిశీలించారు.

గత సంవత్సరం సమ్మిట్ కోసం చేసిన ఖర్చును ఈ సంవత్సరం మళ్లీ చేయవద్దని సీఎం రేవంత్ రెడ్డి ఆదేశించినట్టు మంత్రి తెలిపారు. స్కిల్ యూనివర్సిటీ నిర్మాణాన్ని పూర్తి చేసి, సమ్మిట్‌ను అక్కడే నిర్వహించాలని సీఎం సూచించారని ఆయన చెప్పారు. ఆ ఆదేశాల ప్రకారం గత నాలుగు నెలల నుంచి పనులు వేగవంతంగా జరుగుతున్నాయని తెలిపారు.

ఈ సారి గత ఏడాది కంటే ఎక్కువ పెట్టుబడులు ఆకర్షించడమే లక్ష్యమని మంత్రి తెలిపారు. 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా తీర్చిదిద్దాలన్నది ప్రభుత్వ లక్ష్యమని ఆయన చెప్పారు.

సమ్మిట్ కోసం స్కిల్ యూనివర్సిటీ సిద్ధంగా ఉంటుందని వివేక్ వెంకటస్వామి తెలిపారు.