GO 111 జోన్‌లో గ్రీన్ సిటీ ప్రణాళిక: 84 గ్రామాల్లో నియంత్రిత అభివృద్ధి

హైదరాబాద్ పరిసరాల్లో GO 111 పరిధిలో కొత్త గ్రీన్ సిటీ ప్రణాళికపై చర్చ జరుగుతోంది. ఉస్మాన్ సాగర్, హిమాయత్ సాగర్ జలాశయాల పరిరక్షణ కోసం 1996లో GO 111 తీసుకొచ్చారు. ఈ పరిధిలో 1.32 లక్షల ఎకరాలు, 84 గ్రామాలు ఉన్నాయి.

ఈ ప్రాంతాన్ని పూర్తిగా కాంక్రీట్ డెవలప్‌మెంట్‌గా మార్చకుండా నియంత్రిత అభివృద్ధి చేయాలని ప్రతిపాదన ఉంది. సుమారు 40 శాతం భూమిని నిర్మాణాలకు, 60 శాతం రోడ్లు, గ్రీనరీ, ఓపెన్ స్పేస్‌లకు కేటాయించాలని పరిశీలిస్తున్నారు. భారీ హైరైజ్ అపార్ట్‌మెంట్లకు బదులు విల్లా కమ్యూనిటీలు, గ్రీన్ బిల్డింగ్‌లు, రిసార్ట్లు, తక్కువ జనసాంద్రత గల హౌసింగ్ ప్రాజెక్టులకు ప్రాధాన్యం ఇచ్చే అవకాశం ఉంది.

తొలి దశలో ORR లోపల ఉన్న 6 నుంచి 8 గ్రామాల్లో పరిమిత స్థాయిలో అభివృద్ధికి అనుమతించాలని ప్రతిపాదన ఉంది. ఈ గ్రామాల్లో ఫలితాలను పరిశీలించిన తర్వాత మిగతా ప్రాంతాలపై నిర్ణయం తీసుకుంటారు. సహజ నీటి ప్రవాహం లేని నాన్ క్యాచ్‌మెంట్ ప్రాంతాలకు అభివృద్ధిలో ఎక్కువ ప్రాధాన్యం ఇవ్వనున్నారు. సహజ వర్షపు నీటి కాలువలను మ్యాపింగ్ చేసి జియో ట్యాగింగ్ చేస్తారు.

మురుగు నీటి విషయంలో కఠిన నిబంధనలు ఉంటాయి. ప్రాజెక్టులు తమ పరిధిలోనే నీటిని శుద్ధి చేసి తిరిగి వినియోగించుకునే జీరో లిక్విడ్ డిశ్చార్జ్ విధానం ఏర్పాటు చేయాలి. కాలుష్యకారక పరిశ్రమలు, రసాయన పరిశ్రమలు, రెడ్ కేటగిరీ కార్యకలాపాలపై నియంత్రణ కొనసాగుతుంది. జోనింగ్ మాస్టర్ ప్లాన్ అమల్లోకి వస్తే ఈ ప్రాంతం హైదరాబాద్ రియల్ ఎస్టేట్ మ్యాప్‌లోకి వస్తుందని పరిశ్రమ నిపుణులు చెబుతున్నారు.

హైదరాబాద్ దక్షిణ, పశ్చిమ శివార్లలో ఈ ప్రణాళికతో మరో గ్రోత్ కారిడార్ ఏర్పడే అవకాశం ఉందని పరిశ్రమ నిపుణులు అంచనా వేస్తున్నారు. అయితే ఎక్కడైనా నిర్మించుకోవచ్చనే పరిస్థితి ఉండదని స్పష్టమవుతోంది. భూమి విలువలు నిర్ణయించడంలో జోనింగ్, క్యాచ్‌మెంట్ స్థితి, రోడ్ల కనెక్టివిటీ, డ్రైనేజీ, నీటి వసతులు, అనుమతులు కీలకంగా మారనున్నాయి.