హైదరాబాద్‌లో భారీ వర్షం: రోడ్లు జలమయం, రంగారెడ్డి-సంగారెడ్డికి ఆరెంజ్ అలర్ట్

హైదరాబాద్‌లో రాత్రి కురిసిన భారీ వర్షానికి పలు ప్రాంతాల్లో రోడ్లు జలమయమయ్యాయి. చార్మినార్, యాకత్‌పుర, చంపాపేట్, దిల్‌సుఖ్‌నగర్ తదితర ప్రాంతాల్లో మోకాలు లోతు నీరు చేరడంతో వాహనాల రాకపోకలు స్తంభించాయి.

మేడ్చల్ జిల్లా కాప్ర ప్రాంతంలో అత్యధికంగా 6.9 సెం.మీ వర్షపాతం నమోదు కాగా, కొంగరకాలాన్‌లో 4.7 సెం.మీ, మంకాల్‌లో 4.4 సెం.మీ, చంద్రయానగుట్టలో 4.1 సెం.మీ, ఉప్పల్ రాజీవ్ నగర్‌లో 4 సెం.మీ, గచ్చిపల్లిలో 3.8 సెం.మీ వర్షం కురిసింది. వాతావరణ శాఖ రంగారెడ్డి, సంగారెడ్డి జిల్లాలకు ఆరెంజ్ అలర్ట్ జారీ చేసింది. పలు జిల్లాలకు ఎల్లో అలర్ట్ ఇచ్చింది.

రాబోయే 2-3 రోజుల్లో తెలంగాణలోని ఉత్తర, ఈశాన్య, దక్షిణ జిల్లాలతో పాటు హైదరాబాద్‌లోనూ భారీ వర్షాలు కురిసే అవకాశం ఉందని వాతావరణ శాఖ తెలిపింది. నైరుతి రాజస్థాన్‌పై ఉపరితల ఆవర్తనం కారణంగా ఈ వర్షాలు కురుస్తున్నాయి. ప్రజలు అప్రమత్తంగా ఉండాలని అధికారులు సూచించారు.