హైదరాబాద్‌లో భారీ వర్షం: ముషీరాబాద్, గోల్కొండలో అత్యధికంగా 4 సెం.మీ. వర్షపాతం

గురువారం సాయంత్రం హైదరాబాద్‌లో భారీ వర్షం కురిసింది. నగరంలోని ముషీరాబాద్, గోల్కొండ ప్రాంతాల్లో అత్యధికంగా 4 సెంటీమీటర్ల వర్షపాతం నమోదైంది. లోతట్టు ప్రాంతాలు జలమయం కావడంతో పలు రోడ్లపై ట్రాఫిక్ జామ్ అయింది. పోలీసులు ప్రజలను బయటకు రావద్దని సూచించారు.

జూబ్లీ హిల్స్, బంజారా హిల్స్, ఫిలిం నగర్, సికింద్రాబాద్, అమీర్పేట్, కూకట్పల్లి, బాచుపల్లి తదితర ప్రాంతాల్లో భారీ వాన పడింది. బోయినపల్లి, మారేడిపల్లి, రామగోపాల్పేటలో ఉరుములు మెరుపులతో వర్షం కురిసింది. హైదరాబాద్-వరంగల్ జాతీయ రహదారిపై వర్షపు నీరు నిలవడంతో వాహనదారులు ఇబ్బందులు ఎదుర్కొన్నారు. బాచుపల్లి నుంచి గండి మైసమ్మ ఫ్లై ఓవర్ మార్గంలో నీరు నిలిచి ట్రాఫిక్‌కు అంతరాయం కలిగింది.

హైదరాబాద్ ఇంచార్జ్ మంత్రి పొన్నం ప్రభాకర్ వర్ష పరిస్థితులను సమీక్షించారు. జీహెచ్‌ఎంసీ కమిషనర్, జిల్లా కలెక్టర్, సిటీ పోలీస్ కమిషనర్‌లతో మాట్లాడి అన్ని శాఖల సమన్వయంతో సహాయ చర్యలు చేపట్టాలని ఆదేశించారు. సిటీ పోలీస్ కమిషనర్ సజ్జనార్ అత్యవసర సహాయానికి డయల్ 100కు కాల్ చేయాలని సూచించారు. ట్రాఫిక్ జాయింట్ సీపీ జోయల్ డేవిస్ వాటర్ లాగింగ్ పాయింట్ల వద్ద నీటిని తొలగించి ట్రాఫిక్ క్లియర్ చేయాలని ఆదేశించారు. వాటర్ బోర్డు ఎండీ అశోక్ రెడ్డి అధికారులు 24 గంటలూ క్షేత్ర స్థాయిలో పర్యవేక్షించాలని, మ్యాన్‌హోల్‌ల దగ్గర హెచ్చరిక బోర్డులు ఏర్పాటు చేయాలని సూచించారు.

విద్యానగర్, బన్సిలాల్పేట్, బోలక్పూర్, జవహర్‌నగర్, అడిక్మెట్‌ల్లో 3 సెంటీమీటర్లు, షేక్పేట్, నాచారం, అంబర్పేట్, ఉప్పల్, ఆసిఫ్‌నగర్ తదితర ప్రాంతాల్లో 2 సెంటీమీటర్ల వర్షం నమోదైంది. నగరంలో ట్రాఫిక్ క్రమంగా నెమ్మదిగా సాగుతోంది.