హైదరాబాద్ లో భారీ వర్షాలు, రేవంత్ విమానం బెంగళూరుకు మళ్లింపు

హైదరాబాద్ సహా తెలంగాణలోని పలు జిల్లాల్లో రాత్రి భారీ వర్షం కురిసింది. వాతావరణ శాఖ వివరాల ప్రకారం, నగరంలోని అనేక ప్రాంతాలు నీట మునిగాయి. గంటకు 60 కిలోమీటర్ల వేగంతో ఈదురు గాలులు వీచాయి.

షంషాబాద్ ఎయిర్పోర్ట్ వద్ద వాతావరణం అనుకూలంగా లేకపోవడంతో సీఎం రేవంత్ రెడ్డి ప్రయాణిస్తున్న విమానం ఢిల్లీ నుంచి నేరుగా ల్యాండ్ కాకుండా బెంగళూరుకు మళ్లించారు. ఈ ఘటనలో రేవంత్ అక్కడే బస చేశారు.

కొండాపూర్, గచ్చిబౌలి, మాదాపూర్, ఉప్పల్, బండ్లగూడ, నర్సింగి, అల్వాల్ తదితర ప్రాంతాల్లో భారీ వర్షం కురవడంతో రోడ్లు జలమయమయ్యాయి. ట్రాఫిక్ జామ్ ఏర్పడింది. విద్యుత్ స్తంభాలు విరిగిపడటం, ట్రాన్స్ఫార్మర్లు పేలడంతో కొన్ని చోట్ల విద్యుత్ సరఫరా నిలిపివేశారు.

వాతావరణ శాఖ పలు జిల్లాలకు యెల్లో, ఆరెంజ్ అలర్ట్లు జారీ చేసింది. నేడు కూడా హైదరాబాద్‌తో పాటు మెదక్, సిద్దిపేట, సంగారెడ్డి, జనగాం, రంగారెడ్డి జిల్లాల్లో ఉరుములు, మెరుపులతో భారీ వర్షం కురిసే అవకాశం ఉన్నట్లు అధికారులు తెలిపారు. ప్రజలు అప్రమత్తంగా ఉండాలని, లోతట్టు ప్రాంతాలకు, విద్యుత్ స్తంభాలకు దూరంగా ఉండాలని సూచించారు.