సల్కం చెరువు అక్రమ నిర్మాణాలు: ఉన్నతాధికారులకు హైకోర్టు ధిక్కరణ నోటీసులు

హైదరాబాద్‌లోని బండ్లగూడలో సల్కం చెరువు భూమిపై అక్రమ నిర్మాణాలకు సంబంధించి ఉన్నతాధికారులు కోర్టు ధిక్కరణకు పాల్పడినట్టు హైకోర్టు నోటీసులు జారీ చేసింది. పురపాలక శాఖ ప్రత్యేక ప్రధాన కార్యదర్శి జయేశ రంజన్, హైడ్రా కమిషనర్ రంగనాథ్ తో పాటు విద్యా, రెవెన్యూ, నీటిపారుదల శాఖల ఉన్నతాధికారులకు ఈ నోటీసులు పంపారు.

సల్కం చెరువు ప్రాంతంలో సాలార్-ఎ-మిల్లత్ విద్యా ట్రస్ట్ నిర్వహిస్తున్న బారిస్టర్ ఫాతిమా ఓవైసి ఎడ్యుకేషనల్ క్యాంపస్ అక్రమ నిర్మాణాలు చేపట్టిందన్న ఆరోపణల నేపథ్యంలో, హైకోర్టు ఇంతకుముందు అధికారులకు విచారణ చేయాలని, నివేదిక సమర్పించాలని ఆదేశించింది. అయితే, ఈ ఆదేశాలు అమలుకాలేదు.

దీనిపై న్యాయవాది విజయ్ గోపాల్ హైకోర్టులో కోర్టు ధిక్కరణ పిటిషన్ దాఖలు చేశారు. 1997, 2010, 2015 సంవత్సరాల్లో ఆ భూమి చెరువుకు చెందినదిగా కోర్టు ఉత్తర్వులు స్పష్టంగా ఉన్నాయని, అధికారులు ఉద్దేశపూర్వకంగా వాటిని ఉల్లంఘించారని పిటిషనర్ తరఫున వాదనలు వినిపించారు.

జస్టిస్ ఎన్వి శ్రవణ్ కుమార్ ఈ కేసును విచారించారు. అధికారులు రిజిస్ట్రేషన్లపై వివరణ ఇవ్వాలని, కలెక్టర్‌ను ప్రతివాదిగా చేర్చాలని న్యాయవాది కోరారు. వాదనలు విన్న న్యాయమూర్తి ఐఏఎస్ అధికారులతో పాటు ఇతర అధికారులకు నోటీసులు జారీ చేస్తూ, తదుపరి విచారణను 11వ తేదీకి వాయిదా వేశారు.