హైదరాబాద్‌లోని ప్రముఖ హోటళ్లకు హైకోర్టు రూ.20 లక్షల జరిమానా

హైదరాబాద్‌లోని అబిడ్స్‌లోని తాజ్ మహల్ హోటల్, సికింద్రాబాద్‌లోని తాజ్ ట్రైస్టార్ హోటల్‌కు తెలంగాణ హైకోర్టు రూ.20 లక్షల జరిమానా విధించింది.

TSSPDCL విద్యుత్తు బిల్లు బకాయిల కారణంగా హోటళ్లకు నోటీసులు జారీ చేసింది. తాజ్ మహల్‌కు రూ.27 లక్షలు, తాజ్ ట్రైస్టార్‌కు రూ.77 లక్షల బకాయిలు ఉన్నాయి. హోటళ్లు ఈ నోటీసులను హైకోర్టులో సవాల్ చేశాయి. తర్వాత, విద్యుత్ సంస్థతో వాయిదా చెల్లింపు ఒప్పందం కుదుర్చుకుని, మొదటి వాయిదా చెల్లించిన తర్వాత మళ్లీ కోర్టుకు వెళ్లాయి. అయితే, ముందస్తు ఒప్పందం వివరాలను కోర్టుకు తెలియజేయలేదు.

ఈ విషయాన్ని గుర్తించిన న్యాయమూర్తి జస్టిస్ నగేష్ భీమపాక తీవ్ర అసంతృప్తి వ్యక్తం చేశారు. ‘న్యాయదేవత కండ్లకు గంతలు కట్టుకుని ఉండటం వల్ల కోర్టును మోసం చేయొచ్చని పిటిషనర్ భావించారు’ అని వ్యాఖ్యానించారు. ఇరు హోటళ్లకు రూ.20 లక్షల జరిమానా విధించి, ఆ మొత్తాన్ని తెలంగాణ రాష్ట్ర న్యాయసేవా ప్రాధికార సంస్థకు చెల్లించాలని ఆదేశించారు.