హైదరాబాద్‌లో మొహరం ఊరేగింపునకు భారీ పోలీసు బందోబస్తు

హైదరాబాద్ లోని పాతబస్తీలో మొహరం ఊరేగింపునకు ఏర్పాట్లు పూర్తయ్యాయి. చారిత్రాత్మక బీబీకా ఆలం ఊరేగింపు సహా పలు మాతం జులూస్లు నిర్వహించేందుకు ప్రభుత్వం, పోలీసు యంత్రాంగం భారీ బందోబస్తు ఏర్పాటు చేశాయి.

ఈ ఊరేగింపు చార్మినార్, అక్కత్పుర, దబీర్పుర, గుల్జార్ హౌస్, మీరాంమండి, పురానా హవేలీ, నయాపూల్ తదితర ప్రాంతాల మీదుగా సాగుతుంది. 7 కిలోమీటర్ల మేర జరిగే ఈ ఊరేగింపులో షియా ముస్లింలు పాల్గొంటారు.

బందోబస్తు నిర్వహణకు 2000 మంది పోలీసులను రంగంలోకి దించారు. స్థానిక పోలీసులతో పాటు ఇతర జిల్లాల పోలీసులు, టాస్క్ ఫోర్స్, క్రైమ్ టీమ్స్, షీ టీమ్స్, ట్రాఫిక్ పోలీసులు విధుల్లో ఉంటారు.

ఊరేగింపు మార్గాల్లో ట్రాఫిక్ ఆంక్షలు విధించారు. వాహనాలను ప్రత్యామ్నాయ మార్గాలకు మళ్లిస్తున్నారు. ప్రయాణికులు రద్దీని దృష్టిలో ఉంచుకుని ప్రత్యామ్నాయ మార్గాలు ఎంచుకోవాలని పోలీసులు సూచించారు.

విద్యుత్ తీగలకు జెండాలు తగలకుండా జాగ్రత్త తీసుకోవాలని విద్యుత్ శాఖ సిబ్బంది సూచించారు. ఎలాంటి అవాంఛనీయ సంఘటనలు జరగకుండా అధికారులు పటిష్ట చర్యలు తీసుకున్నారు.