హైదరాబాద్ రద్దీ ప్రాంతాల్లో కొత్త ఫ్లైఓవర్ల నిర్మాణం

తెలంగాణ ప్రభుత్వం హైదరాబాద్‌లో ట్రాఫిక్ ఇబ్బందులను తగ్గించేందుకు మరో చర్య తీసుకుంది. నగరంలోని అత్యంత రద్దీ ప్రాంతాలైన నాగార్జున సర్కిల్, టీవీ9 జంక్షన్‌లలో కొత్త ఫ్లైఓవర్ల నిర్మాణానికి అనుమతి మంజూరు చేసింది. హెచ్‌సిటీ ప్రాజెక్టులో భాగంగా ఈ ప్రాజెక్టు చేపట్టనున్నారు.

నాగార్జున సర్కిల్, టీవీ9 జంక్షన్‌లలో ఫ్లైఓవర్లు, అండర్‌పాస్‌ల నిర్మాణానికి GO 736 ద్వారా రూ. 368 కోట్ల పరిపాలన అనుమతి ఇవ్వబడింది. గతంలో ఈ అంచనా రూ. 210 కోట్లుగా ఉండగా, ఇప్పుడు అది రూ. 368 కోట్లకు పెరిగింది. ఈ అదనపు వ్యయభారంతో విప్రో జంక్షన్ గ్రేడ్ సెపరేటర్ నిర్మాణం తాత్కాలికంగా నిలిపివేయబడింది.

NFCL జంక్షన్ వద్ద రూ. 147 కోట్లతో రెండు లైన్ల ఫ్లైఓవర్ రానుంది. ఇది బంజారా హిల్స్ రోడ్ నంబర్ 3 నుంచి GVK మాల్ వైపు వాహనాలకు వీలు కల్పిస్తుంది. ముద్దా జంక్షన్ నుంచి NFCL వరకు మూడు లైన్ల స్టీల్ ఫ్లైఓవర్, NFCL నుంచి శ్రీనగర్ కాలనీ వరకు రెండు లైన్ల అండర్‌పాస్‌ నిర్మించనున్నారు. ఈ జంక్షన్‌లో మొత్తం రూ. 221 కోట్లతో స్టీల్ ఫ్లైఓవర్, అండర్‌పాస్‌ చేపట్టనున్నారు. రద్దీ ఎక్కువగా ఉండడంతో కాంక్రీట్ స్థానంలో స్ట్రక్చరల్ స్టీల్ ఫ్లైఓవర్‌కు ప్రభుత్వం ఆమోదం తెలిపింది. EPC విధానంలో టెండర్లు ఆహ్వానించి, భూసేకరణ, యుటిలిటీ షిఫ్టింగ్‌తో పాటు నిర్మాణాన్ని వేగంగా పూర్తి చేయాలని అధికారులు ఆదేశించారు.