హైదరాబాద్‌లో హారన్ల హోరుతో తీవ్రమవుతున్న శబ్ద కాలుష్యం, ప్రజల ఆరోగ్యానికి ముప్పు

హైదరాబాద్‌లో వాహనాల హారన్లు, ట్రాఫిక్ రద్దీ కారణంగా శబ్ద కాలుష్యం తీవ్ర స్థాయికి చేరుకుంది. తెలంగాణ కాలుష్య నియంత్రణ మండలి 2016 నుంచి 2025 వరకు సేకరించిన గణాంకాల ప్రకారం నగరంలో శబ్ద స్థాయిలు ప్రమాదకరంగా పెరుగుతున్నాయి.

బస్సులు, లారీలు, కార్లు, బైక్‌ల హారన్ల నుంచి 90 నుండి 110 డెసిబెల్స్ వరకు శబ్దం వెలువడుతుండగా, బాణాసంచా 150 డెసిబెల్స్ దాటుతుంది. నిజాంపేట్, కూకట్‌పల్లి, సనత్‌నగర్, అమీర్‌పేట్, పంజాగుట్ట, తార్నాక, కాచిగూడా వంటి ట్రాఫిక్ అధికంగా ఉండే ప్రాంతాల్లో శబ్ద స్థాయి 75 నుంచి 80 డెసిబెల్స్‌గా నమోదవుతోంది. ప్రపంచ ఆరోగ్య సంస్థ సూచించిన పగటిపూట 53, రాత్రిపూట 45 డెసిబెల్స్ పరిమితిని నగరంలోని పలు జంక్షన్లు అధిగమిస్తున్నాయి.

అధిక శబ్దం కారణంగా వినికిడి శక్తి తగ్గడం, టిన్నిటస్, అధిక రక్తపోటు, గుండె సంబంధిత సమస్యలు, మానసిక ఒత్తిడి, నిద్రలేమి, పిల్లల్లో ఏకాగ్రత లోపం వంటి ఆరోగ్య సమస్యలు పెరుగుతున్నాయని వైద్యులు హెచ్చరిస్తున్నారు. ఒకప్పుడు వృద్ధుల్లో మాత్రమే కనిపించిన వినికిడి సమస్యలు ఇప్పుడు యువతలోనూ సర్వసాధారణం కావడం ఆందోళన కలిగిస్తోంది.

ముంబై, బెంగళూరు, చెన్నై లాంటి మెట్రో నగరాల్లో అమలవుతున్న నాయిస్ కంట్రోల్ చర్యలు హైదరాబాద్‌లో లోపిస్తున్నాయని నిపుణులు పేర్కొంటున్నారు. నగరంలో ప్రస్తుతం 11 నాయిస్ మానిటరింగ్ స్టేషన్లు శబ్ద స్థాయిలను నమోదు చేస్తున్నా, వాటి ఆధారంగా నిబంధనల అమలు బలహీనంగా ఉంది. సైలెంట్ జోన్లు, అనవసర హారన్లపై జరిమానాలు, నిర్మాణ పనులకు సమయ పరిమితులు వంటి చర్యలు కఠినంగా అమలు చేయాల్సిన అవసరం ఉందని పర్యావరణ నిపుణులు సూచిస్తున్నారు.

ప్రతి వాహనదారుడు అవసరమైనప్పుడే హారన్ వినియోగించడం, నిబంధనలను గౌరవించడం, పచ్చదనాన్ని పెంచడం ద్వారానే హైదరాబాద్‌ను మళ్లీ ప్రశాంత నగరంగా మార్చవచ్చునని నిపుణులు అంటున్నారు.