హైదరాబాద్ ORR పై రోజుకు 2.8 లక్షల వాహనాలు; ట్రాఫిక్ తీవ్రత పెరిగింది

హైదరాబాద్ ఔటర్ రింగ్ రోడ్ (ORR) పై రోజువారీ వాహనాల సంఖ్య భారీగా పెరిగింది. ప్రస్తుతం ప్రతిరోజు 2,80,000 వాహనాలు ప్రయాణిస్తున్నాయి. గతంలో ఈ రూట్‌ను ఎక్కువగా లాంగ్ డిస్టెన్స్, ఎయిర్‌పోర్ట్ వెళ్లే వాహనాలు ఉపయోగించేవి. కానీ ఇప్పుడు IT ఉద్యోగులు, స్థానిక నివాసితులు కూడా రోజూ ORR పైనే ప్రయాణిస్తున్నారు.

ఉదయం 9 నుంచి 12 గంటల వరకు, సాయంత్రం 6 నుంచి 8 గంటల వరకు ట్రాఫిక్ తీవ్రంగా ఉంటుందని వాహనదారులు చెబుతున్నారు. ORR చుట్టూ భారీ రెసిడెన్షియల్ టౌన్‌షిప్‌లు వస్తుండడమే ప్రధాన కారణమని పోలీసులు అంటున్నారు. కోకాపేట్, నార్సింగి, నానక్రామగూడ, గచ్చిబౌలి, తెల్లాపూర్, కొల్లూరు, పఠాన్‌చేరు ప్రాంతాల్లో వేల ఫ్లాట్లతో కూడిన ప్రాజెక్టులు నిర్మాణంలో ఉన్నాయి. ఒక్కో ప్రాజెక్టులో 2,000 నుంచి 3,000 ఫ్లాట్లు ఉండగా, ప్రస్తుతం వాటిలో కేవలం 30% మాత్రమే నిండాయి. మిగిలిన ఫ్లాట్లు రెండేళ్లలో పూర్తయితే వేల కొత్త వాహనాలు రోడ్డుపైకి వస్తాయని పోలీసులు హెచ్చరిస్తున్నారు.

IT రంగం విస్తరణ కూడా ట్రాఫిక్‌ను మరింత పెంచుతోంది. లక్షల మంది సాఫ్ట్‌వేర్ ఉద్యోగులు ఒకే సమయంలో ఆఫీసులకు వెళ్లడం, రావడం వల్ల రద్దీ పెరుగుతుంది. వాహనదారులు కార్‌పూలింగ్, షేరింగ్ విధానాలు పాటిస్తే ట్రాఫిక్ కొంత తగ్గుతుందని సూచిస్తున్నారు. నానక్రామగూడ సర్కిల్ నుంచి గచ్చిబౌలి వైపు టూ వీలర్లకు, ఆటోలకు అనుమతి ఇవ్వడం వల్ల కూడా రద్దీ పెరిగినట్టు ప్రయాణికులు తెలిపారు.

సర్వీస్ రోడ్లలోనూ ట్రాఫిక్ ఇబ్బందులు ఎదురవుతున్నాయి. ఓఆర్‌ఆర్ నుంచి సర్వీస్ రోడ్లకు వచ్చే వాహనాలు, అక్కడి నుంచి ప్రధాన రహదారులకు వెళ్లేవి రద్దీగా ఉండడంతో ప్రయాణ సమయం గణనీయంగా పెరిగింది. గతంలో 10 నిమిషాల్లో వెళ్లే దూరం ఇప్పుడు 40 నుంచి 45 నిమిషాలు పడుతోందని స్థానికులు వాపోతున్నారు. టోల్ ప్లాజాల వద్ద కూడా ఫాస్ట్‌ట్యాగ్ ఉన్నా పీక్ అవర్స్‌లో పొడవాటి క్యూలు కనిపిస్తున్నాయి.

వాహనదారులు భవిష్యత్ అవసరాలను దృష్టిలో పెట్టుకుని కొత్త ఇంటర్ఛేంజ్‌లు, అదనపు లైన్లు, సర్వీస్ రోడ్ల విస్తరణ, మెరుగైన ట్రాఫిక్ నిర్వహణ చర్యలు చేపట్టాలని కోరుతున్నారు. ORR పై పెరుగుతున్న ట్రాఫిక్ ఒత్తిడిని ఎదుర్కోవడానికి దీర్ఘకాలిక ప్రణాళిక అవసరమని నిపుణులు అంటున్నారు.