పోస్టల్ సేవల ద్వారా గంజాయి సరఫరా: అంతర్రాష్ట్ర ముఠా అరెస్ట్

హైదరాబాద్ నార్కోటిక్స్ ఎన్ఫోర్స్మెంట్ వింగ్ పోలీసులు పోస్టల్ సేవల ద్వారా గంజాయి సరఫరా చేస్తున్న అంతర్రాష్ట్ర ముఠాను అరెస్టు చేశారు. జార్ఖండ్ కేంద్రంగా నడిచిన ఈ నెట్వర్క్ దేశంలోని 21 రాష్ట్రాలకు స్పీడ్ పోస్ట్, ప్రైవేట్ కొరియర్ల ద్వారా డ్రగ్స్ పంపించింది.

సత్యం మిశ్రా, అతని సోదరుడు శుభం మిశ్రా జార్ఖండ్లోని పొలాల్లో గంజాయి సాగు చేశారని, చిన్న ప్యాకెట్లుగా చేసి మందుల పార్సెల్ల పేరుతో స్పీడ్ పోస్ట్ బుక్ చేశారని హైదరాబాద్ సీపీ సజ్జనార్ తెలిపారు. టెలిగ్రామ్ ద్వారా కోడ్ పదాలతో ఆర్డర్లు తీసుకుని, UPI చెల్లింపులు స్వీకరించిన వెంటనే పార్సెల్లు అందించేవారు.

నిందితులు రెండు రకాల డెలివరీ పద్ధతులను అనుసరించారు. స్పీడ్ పోస్ట్ ద్వారా డోర్ డెలివరీ చేయడంతోపాటు, నేరుగా వినియోగదారుల ఇళ్ల దగ్గరికి వెళ్లి గంజాయి అందించారు. ఈ వ్యాపారం ద్వారా ఏడాదికి సుమారు నాలుగు నుంచి ఐదు కోట్ల రూపాయలు అక్రమంగా సంపాదించినట్లు పోలీసులు తెలిపారు. జార్ఖండ్ నుంచి రైళ్లలో ముంబైకి తరలించి, అక్కడి నుంచి లోకల్ రవాణా ద్వారానూ సరఫరా చేసినట్లు సజ్జనార్ వివరించారు.

కేసులో ఇద్దరు హైదరాబాద్ వినియోగదారులతోపాటు ప్రధాన నిందితుడు అరెస్టు కాగా, మరో నలుగురు పరారిలో ఉన్నారు. విమానాశ్రయాలు, రైల్వే స్టేషన్లు, కొరియర్ కార్యాలయాల్లో అన్ని పార్సెల్లను తప్పనిసరిగా స్కానింగ్ చేయాలని సీపీ సూచించారు. అనుమానాస్పద పార్సెల్ కనిపిస్తే వెంటనే పోలీసులకు సమాచారం ఇవ్వాలని కొరియర్ సంస్థలకు ఆదేశించారు. ఇండియా పోస్టుతోపాటు సంబంధిత శాఖలకు నివేదిక పంపిస్తామని సజ్జనార్ తెలిపారు.