హైదరాబాద్‌లో కల్తీ మసాలా, సింథటిక్ పన్నీర్ తయారీ ముఠా అరెస్ట్; 16 మంది నిందితులు

హైదరాబాద్‌లో కల్తి మసాలా దినుసులు, సింథటిక్ పన్నీర్ తయారీ ముఠాను హెచ్ ఫాస్ట్ పోలీసులు గుర్తించి 16 మందిని అరెస్ట్ చేశారు. పైలార్, దేవపల్లి, కాటేదాన్, బాలాపూర్, పహాడి షరీఫ్ ప్రాంతాల్లోని తయారీ యూనిట్లపై దాడులు జరిపారు.

సైబరాబాద్ పోలీస్ కమిషనర్ సజ్జనార్ మాట్లాడుతూ, గతంలో కూడా ఇలాంటి కేసులను పట్టుకున్నామని, యూరియా, డిటర్జెంట్ పౌడర్, పామ్ ఆయిల్, హానికర రసాయనాలు ఉపయోగించి సింథటిక్ పన్నీర్ తయారు చేస్తున్నట్లు వెల్లడించారు. దాడుల్లో 1.5 టన్నుల సింథటిక్ పన్నీర్, 2.5 టన్నుల కల్తి పెరుగు, 3.2 టన్నుల క్రీమ్, నెయ్యి, నూనె స్వాధీనం చేసుకున్నట్టు తెలిపారు.

ప్రజారోగ్యానికి ఇది హానికరమని, కల్తీదారులపై కఠిన చర్యలు తీసుకుంటామని సజ్జనార్ హెచ్చరించారు. బిఎన్‌ఎస్ సెక్షన్ల కింద కేసు నమోదు చేసినట్టు చెప్పారు. ప్రజలు అప్రమత్తంగా ఉండాలని, బ్రాండెడ్ ఉత్పత్తులను మాత్రమే కొనుగోలు చేయాలని సూచించారు.