ఇందిరమ్మ ఇండ్ల పథకం పేరుతో సైబర్ మోసాలు: హైదరాబాద్ పోలీసుల హెచ్చరిక

ఇందిరమ్మ ఇండ్ల పథకం లబ్ధిదారులను టార్గెట్ చేస్తూ సైబర్ నేరగాళ్లు మోసాలకు పాల్పడే అవకాశం ఉందని హైదరాబాద్ పోలీస్ కమిషనర్ సజ్జనార్ హెచ్చరించారు.

ప్రభుత్వం తరపున మాట్లాడుతున్నామని, ₹10,000 ముందస్తు చెల్లిస్తే ఇల్లు మంజూరు చేస్తామని ఫోన్లు చేస్తున్నట్లు ఆయన తెలిపారు. ఇలాంటి కాల్స్ నమ్మొద్దని సూచించారు.

వాట్సాప్ లింకులు, ఏపీకే ఫైళ్లు, నకిలీ వెబ్‌సైట్ల ద్వారా బ్యాంకింగ్ వివరాలు, ఆధార్ నంబర్లు సేకరించే ప్రయత్నాలు జరుగుతున్నాయి. అపరిచిత లింకులు క్లిక్ చేయొద్దని, వ్యక్తిగత సమాచారం షేర్ చేయొద్దని సైబర్ నిపుణులు హెచ్చరించారు. ఓటీపీ, యూపీఐ పిన్ అడిగినా అది ఖచ్చితంగా మోసమేనని వారు స్పష్టం చేశారు.

మోసానికి గురైతే వెంటనే 1930 నంబరుకు కాల్ చేయాలని, దగ్గరలోని పోలీస్ స్టేషన్‌లో ఫిర్యాదు చేయాలని పోలీసులు సూచించారు. లావాదేవీ వివరాల స్క్రీన్ షాట్లు భద్రపరచడం, వీలైనంత త్వరగా కేసు నమోదు చేయించడం డబ్బులు రికవరీకి కీలకమని వారు చెప్పారు.