హైదరాబాద్‌లో వేల ఆస్తులు నిషేధిత జాబితాలో; రిజిస్ట్రేషన్లు నిలిచిపోయాయి

గ్రేటర్ హైదరాబాద్‌లో దాదాపు 70 నుంచి 80 వేల ప్రాపర్టీలను రెవెన్యూ రికార్డుల ప్రకారం నిషేధిత జాబితాలో చేర్చినట్లు తెలుస్తోంది. దీంతో ఆయా ఆస్తులకు సంబంధించి రిజిస్ట్రేషన్లు నిలిచిపోయాయి.

అధికారులు 22A(1)(D) సెక్షన్ కింద గతంలో ప్రభుత్వ భూమిగా గుర్తించిన (ULC, G-సర్కారీ) స్థలాలను, 22A(1)(A,B,C) కింద మరికొన్ని నిర్మాణాలను ఎలాంటి నోటీసు లేకుండా నిషేధిత జాబితాలో చేర్చారని బాధితులు ఆరోపిస్తున్నారు. అనేక దశాబ్దాల కిందట సేల్ డీడ్ ద్వారా కొనుగోలు చేసి, సొసైటీలు, వెంచర్ల ద్వారా నిర్మించుకున్న ఇళ్లు కూడా ఇప్పుడు ఈ జాబితాలో కనిపిస్తున్నాయి.

సనత్ నగర్ పారిశ్రామిక జోన్‌లోని ఫతే నగర్, యూసఫ్ గూడా, కళ్యాణ్ నగర్ హౌసింగ్ సొసైటీతో పాటు బంజారా హిల్స్, జూబ్లీ హిల్స్, ఫిలిం నగర్, పంజాగుట్ట, SR నగర్, అమీర్‌పేట్ వంటి ప్రాంతాల్లో వందలాది ఇళ్లు, అపార్ట్‌మెంట్లు ఈ జాబితాలో చేరాయి. జనప్రియ, కల్పతరు, అవంతి, బ్రిగేడ్ సిటాడెల్, వాసవి వంటి ప్రాజెక్టుల్లోని 5,000కు పైగా కుటుంబాలు ప్రభావితమయ్యాయి.

అత్యవసర పరిస్థితుల్లో ఆస్తులు అమ్మడానికి లేదా లీజుకు ఇవ్వడానికి రిజిస్ట్రేషన్ కార్యాలయాలకు వెళ్లినప్పుడు ఈ నిషేధం వెలుగులోకి వచ్చింది. సబ్ రిజిస్ట్రార్ కార్యాలయాలు సదరు ప్రాంతం నిషేధిత జాబితాలో ఉన్నందున రిజిస్ట్రేషన్ సాధ్యం కాదని, ఇది కలెక్టర్ పరిధిలోని అంశమని సమాధానమిస్తున్నట్లు బాధితులు తెలిపారు. దీంతో పలువురు కలెక్టరేట్‌కు చేరుకొని ప్రజావాణిలో ఫిర్యాదులు చేస్తున్నారు. అయితే ఫిర్యాదులు స్వీకరించడానికే పరిమితమవుతున్నాయని, ఇప్పటి వరకు పరిష్కారం లభించలేదని వారు చెబుతున్నారు.

పక్కా అనుమతులతో నిర్మించిన, సంవత్సరాల క్రితం కొనుగోలు చేసిన ఆస్తులు కూడా ప్రొబేషనరీ జాబితాలో చేరడంపై ఆయా కుటుంబాలు ఆందోళన వ్యక్తం చేస్తున్నాయి. ఈ విషయంపై రెవెన్యూ అధికారుల పూర్తి వివరణ రావాల్సి ఉంది.