హైదరాబాద్‌లో వర్షం: కొండాపూర్‌లో నీట మునిగిన రోడ్లు, ట్రాఫిక్ స్తంభం

హైదరాబాద్‌లో వారాంతంలో కురిసిన భారీ వర్షానికి నగరంలోని పలు ప్రాంతాలు నీట మునిగాయి. కొండాపూర్, గచ్చిబౌలి, మాదాపూర్ వంటి ఐటీ కారిడార్ ప్రాంతాల్లో రోడ్లపై మోకాళ్ల లోతు నీరు చేరింది.

ఈ ప్రాంతాల్లోని ఐకేఏ జంక్షన్, రాయిదుర్గం ప్రాంతాల్లో వాహనాలు గంటల తరబడి నిలిచిపోయాయి. ఆఫీసుల నుంచి ఇళ్లకు వెళ్తున్న ఐటీ ఉద్యోగులు కిలోమీటర్ల మేర రోడ్డుపై నడవాల్సి వచ్చింది. చాలా మంది వాహనాలు కదలకపోవడంతో కార్యాలయాల్లోనే ఉండిపోయారు.

కూకట్‌పల్లి, మూసాపేట, మియాపూర్ ప్రాంతాల్లో ముంబై హైవేపై వాహనాలు కిలోమీటర్ల మేర నిలిచిపోయాయి. మ్యాన్‌హోల్‌లు కనిపించక, రోడ్లు గుంతలు పడడంతో వాహనదారులు తీవ్ర ఇబ్బందులు పడ్డారు.

చిన్న వర్షానికే డ్రైనేజీలు పొంగి రోడ్లు నీట మునగడం సర్వసాధారణమైంది. మున్సిపల్ సిబ్బంది రంగంలోకి దిగి రోడ్లపై నుంచి నీటిని తొలగించే చర్యలు చేపట్టారు. వర్షం పడగానే ఫ్లైఓవర్ల కింద వాహనాలు ఆపడం వల్ల కూడా ట్రాఫిక్ జామ్ అవుతుందని పలువురు వాహనదారులు అభిప్రాయపడ్డారు.