FSSAI హైజీన్ రేటింగ్‌లో హైదరాబాద్ మెట్రో నగరాల్లో చివరి స్థానంలో

FSSAI విడుదల చేసిన హైజీన్ రేటింగ్స్‌లో హైదరాబాద్ మెట్రో నగరాల్లో ఆఖరి స్థానంలో నిలిచింది. నగరంలోని 75 వేలకు పైగా హోటళ్లలో కేవలం 361 మాత్రమే రేటింగ్ పొందాయి.

ఇతర నగరాలతో పోలిస్తే బెంగళూరు 2,200, ఢిల్లీ 3,394 రేటెడ్ రెస్టారెంట్లతో ముందున్నాయి. అహ్మదాబాద్, జైపూర్ వంటి చిన్న నగరాలు సైతం హైదరాబాద్ కంటే మెరుగ్గా ఉన్నాయి.

బిర్యానీ, హలీం వంటి రుచులకు యునెస్కో సిటీ ఆఫ్ గాస్ట్రోనమీగా గుర్తింపు పొందిన ఈ నగరం ఇప్పుడు పరిశుభ్రత విషయంలో విమర్శలు ఎదుర్కొంటోంది. ఇటీవలి తనిఖీల్లో అధికారులు వంటగదుల్లో ఎలుకలు, బొద్దింకలు, గడువు ముగిసిన ఆహారం, పని చేయని ఫ్రీజర్లు, సరైన నిల్వ లేని పదార్థాలు గుర్తించారు.

డైనింగ్ ఏరియాలు ఆకర్షణీయంగా కనిపించినా కిచెన్ పరిసరాలు మాత్రం అపరిశుభ్రంగా ఉన్నాయని అధికారులు చెబుతున్నారు. దాదాపు 50 వేల హోటళ్లు లైసెన్సులు లేకుండానే నడుస్తున్నాయని సమాచారం.

సోషల్ మీడియా ఫుడ్ ఇన్ఫ్లుయెన్సర్ల ప్రచారాన్ని నమ్మి రెస్టారెంట్లకు వెళ్తున్నామని, కానీ కిచెన్ హైజీన్ పై ఎలాంటి హామీ లేదని వినియోగదారులు ఆందోళన వ్యక్తం చేస్తున్నారు. ప్రతి రెస్టారెంట్‌కు ఫుడ్ సేఫ్టీ అధికారులు హైజీన్ రేటింగ్ ఇవ్వాలని, కిచెన్ తనిఖీలు తప్పనిసరి చేయాలని వారు డిమాండ్ చేస్తున్నారు.