వర్షంలో హైదరాబాద్ రోడ్ల ప్రాణసంకటం: పెద్ద సంఖ్యలో గుంతలు, వరదలు, ట్రాఫిక్ స్తంభించిపోతోంది

హైదరాబాద్ నగరంలో వర్షాకాలం రోడ్లపై ప్రభావం తీవ్రంగా కనిపిస్తోంది. ప్రధాన రహదారులతో సహా కాలనీల దాకా గుంతలు ఏర్పడి వాహనదారులు తీవ్ర ఇబ్బందులు ఎదుర్కొంటున్నారు. ముఖ్యంగా ఐటీ కారిడార్, పాతబస్తి, దిల్షుఖ్నగర్, ఎల్బీనగర్, కూకట్‌పల్లి, సికింద్రాబాద్ ప్రాంతాల్లో రోడ్ల పరిస్థితి దారుణంగా ఉంది. వర్షపు నీటిలో గుంతలు కనిపించక ప్రమాదాలకు కూడా దారితీస్తున్నాయి.

నగరవాసులు రోజూ గంటల కొద్దీ ట్రాఫిక్ జామ్‌లో చిక్కుకుంటున్నారు. సాధారణంగా పది నిమిషాల దూరం ప్రయాణించేందుకు గంటన్నర పైగా పడుతోందని ప్రయాణికులు చెబుతున్నారు. గుంతల్లో వాహనాలు అదుపు తప్పడంతో వెన్ను నొప్పి, మెడ నొప్పి, స్పాండిలైటిస్ వంటి ఆరోగ్య సమస్యలు తలెత్తుతున్నాయి. షాక్ అబ్సార్బర్లు, టైర్లు, సస్పెన్షన్ వ్యవస్థలు దెబ్బతింటున్నాయి. దీంతో వాహనదారులు నెలనెలా వేల రూపాయలు మరమ్మతులకే ఖర్చు చేయాల్సి వస్తోందని వారు ఆవేదన వ్యక్తం చేస్తున్నారు.

జిహెచ్‌ఎంసీ ప్రతి ఏటా రోడ్ల నిర్వహణకు కోట్ల రూపాయలు కేటాయిస్తున్నా, ఫీల్డ్ లెవల్‌లో నాణ్యమైన మరమ్మతులు జరగడం లేదనే విమర్శలు ఉన్నాయి. ఉదాహరణకు, రాయదుర్గం మెట్రో స్టేషన్ వద్ద కేబుల్ పని కోసం తవ్విన రోడ్డును నెలల తరబడి పునరుద్ధరించకుండా మట్టి కంకరతోనే ఉంచారు. వర్షం పడితే ఇవి బురదమయంగా మారి వాహనాలు జారిపోతున్నాయి. అదే విధంగా, రాష్ట్ర సచివాలయానికి సమీపంలో ఉన్న తెలుగు తల్లి ఫ్లై ఓవర్ పై ఇనుప సీకులు బయటపడి ప్రమాదకరంగా మారాయి. భారీ వాహనాలు వెళ్తుంటే బ్రిడ్జి కంపించడం, రేలింగ్ లు దెబ్బతినడం కూడా గమనించారు.

నిర్మాణం పూర్తయ్యాక కేబులింగ్ గుంతలు సకాలంలో పూడ్చకపోవడంతో పాటు శాశ్వత ప్రాతిపదికన రోడ్లు నిర్మించకపోతే సమస్య తీవ్రమవుతుందని నగరవాసులు హెచ్చరిస్తున్నారు. తాత్కాలిక ప్యాచ్ వర్క్స్ కాకుండా నాణ్యమైన రోడ్ల నిర్వహణ చేపట్టాలని వారు డిమాండ్ చేస్తున్నారు.