సరూర్ నగర్‌లో ఇంట్లో పేలుడు; కుటుంబ సభ్యులు సురక్షితంగా బయటపడ్డారు

హైదరాబాద్ సరూర్ నగర్ పరిధిలోని బాబునగర్‌లో రిటైర్డ్ బ్యాంక్ ఉద్యోగి దేవేందర్ ఇంట్లో పేలుడు సంభవించింది. ఈ ప్రమాదంలో ఇల్లు తీవ్రంగా దెబ్బతింది.

పేలుడు జరిగిన గదిలో ఎవరూ లేకపోవడంతో కుటుంబ సభ్యులు ప్రాణాలతో బయటపడ్డారు. ప్రమాద సమయంలో దేవేందర్ ఇంట్లో లేరు. ఆయన భార్య, కుమారుడు ఇంట్లోనే ఉన్నా, వేరే గదిలో ఉండటంతో వారు సురక్షితంగా ఉన్నారు. ఇంట్లో మూడు గ్యాస్ సిలిండర్లు ఉన్నప్పటికీ అవి పేలకపోవడంతో పెను ప్రమాదం తప్పింది.

ప్రమాదానికి ఖచ్చితమైన కారణం తెలియాల్సి ఉంది. పాత ఫ్రిజ్ లేదా ఏసీ కంప్రెసర్ లో సంభవించిన పేలుడు వల్లే ఈ ఘటన జరిగిందని ప్రాథమికంగా భావిస్తున్నారు. పోలీసులు సంఘటనా స్థలానికి చేరుకుని దర్యాప్తు ప్రారంభించారు. ప్రాణ నష్టం లేదు, కానీ ఇంటికి విలువైన నష్టం వాటిల్లింది.