హైదరాబాద్‌లో ఎస్ఐఆర్ గడువు పూర్తి: దాదాపు 20 లక్షల మంది ఓటర్ల వివరాలు నమోదు కాలేదు

హైదరాబాద్ జిల్లాలో స్పెషల్ ఇంటెన్సివ్ రివిజన్ (ఎస్ఐఆర్) ప్రక్రియలో భాగంగా దాదాపు 20 లక్షల మంది ఓటర్లు ఇంకా ఎన్యుమరేషన్ ఫారాలు సమర్పించలేదు. ఈ నెల 10వ తేదీతో గడువు ముగియనుందని అధికారులు తెలిపారు. ఇప్పటికే రెండుసార్లు గడువు పొడిగించినా, స్పందన ఆశించిన స్థాయిలో లేదు.

హైదరాబాద్ జిల్లాలో మొత్తం 47,36,000 మంది ఓటర్లు ఉండగా, ఇప్పటి వరకు 27,26,655 మంది మాత్రమే ఫారాలు తిరిగి ఇచ్చారు. ఇది మొత్తం ఓటర్లలో 57 శాతం మాత్రమే. మిగిలిన 43 శాతం మంది నుంచి ఫారాలు రాలేదు. బూత్ లెవల్ ఆఫీసర్లు (బిఎల్ఓలు) ఓటర్లకు ఫోన్ చేస్తూ, రాజకీయ పార్టీల నాయకులు, బూత్ ఏజెంట్ల సహకారం కూడా కోరుతున్నారు.

ఆన్‌లైన్ ద్వారా ఇప్పటి వరకు 4,91,236 మంది ఫారాలు సమర్పించారు. హైదరాబాద్‌లో ఉంటున్న చాలా మంది ఓటర్ల పేరు వారి సొంత గ్రామాల్లో కూడా ఉండటంతో, అక్కడే ఓటు కొనసాగించాలని భావిస్తున్నట్లు అధికారులు అంచనా వేస్తున్నారు. గడువు సమీపించడంతో మరో 2 శాతం మంది కూడా ఫారాలు ఇస్తారనే ఆశ లేదని అధికారులు చెబుతున్నారు.

ఒక బిఎల్ఓ మాట్లాడుతూ, "గతంలో రెండు సార్లు గడువు పొడిగించడంతో చాలా మంది నిర్లక్ష్యంగా వ్యవహరించారు. మళ్లీ గడువు పెంచే అవకాశం లేదు. రాబోయే మూడు రోజులు హాలిడేస్ రావడంతో, చాలా మంది ఊళ్లకు వెళ్లే అవకాశం ఉంది. వెంటనే ఫారాలు సమర్పిస్తేనే సురక్షితంగా ఉంటుంది" అని విజ్ఞప్తి చేశారు. ఓటరు ఇంటికి మూడు సార్లు వెళ్లినా అందుబాటులో లేకుంటే, వారిని ఏఎస్డీ కేటగిరీలో చేరుస్తామని, చనిపోయిన వారి వివరాలు కుటుంబ సభ్యుల నిర్ధారణతో డెత్ లిస్టు లో చేరుస్తామని బిఎల్ఓలు తెలిపారు.

అధికారులు ఇచ్చిన సమాచారం ప్రకారం, ప్రతి ఎన్యుమరేషన్ ఫారంను డిజిటలైజ్ చేసి, డూప్లికేట్ లేదా మరణం వంటి కారణాన్ని ఆన్‌లైన్‌లో పేర్కొనాలని సూచించారు. ఈ నెల 10వ తేదీతో ఎస్ఐఆర్ ప్రక్రియ ముగియనుండడంతో, అర్హులైన ప్రతి ఓటరు గడువులోగా ఫారం సమర్పించాలని ఎన్నికల అధికారులు కోరారు.