హైదరాబాద్‌లో ఆకస్మిక వర్షం; 22 నుంచి తెలంగాణలో భారీ వర్షాలు

హైదరాబాద్‌లో ఇవాళ మధ్యాహ్నం ఆకస్మికంగా ఉరుములు, మెరుపులతో కూడిన వర్షం కురిసింది. బోడుప్పల్, ఫిర్జాదిగూడా, ఉప్పల్, హబ్సిగూడా, నాచారం తదితర ప్రాంతాల్లో భారీ వర్షం పడింది. ఉదయం నుంచి ఎండ దంచుకొట్టగా, మధ్యాహ్నం వాతావరణం ఒక్కసారిగా మారిపోయింది. నల్ల మేఘాలు కమ్ముకున్నాయి.

దీంతో ప్రధాన కూడళ్లలో ట్రాఫిక్ జామ్ ఏర్పడి వాహనదారులు ఇబ్బందులు పడ్డారు. ట్రాఫిక్ పోలీసులు వెంటనే రంగంలోకి దిగి ట్రాఫిక్‌ను క్లియర్ చేశారు. ప్రస్తుతం నైరుతి ఋతుపవనాలు హైదరాబాద్, భద్రాద్రి కొత్తగూడెం వరకు విస్తరించాయని వాతావరణ శాఖ అధికారులు తెలిపారు.

జూన్ 22 సాయంత్రం నుంచి రాష్ట్రవ్యాప్తంగా విస్తారంగా వర్షాలు పడే అవకాశం ఉందని వాతావరణ నిపుణులు తెలిపారు. ముఖ్యంగా ఉత్తర, ఈశాన్య తెలంగాణ జిల్లాల్లో భారీ వర్షాలు కురవవచ్చని చెబుతున్నారు. 22-25 తేదీల మధ్య రాష్ట్రంలోని పలు జిల్లాల్లో వర్షాలు పడతాయన్న అంచనా. జూన్ 23 నాటికి మాన్సూన్ పూర్తిగా తెలంగాణ అంతటా వ్యాపించే అనుకూల పరిస్థితులు ఉన్నట్లు వాతావరణ శాఖ పేర్కొంది.

దక్షిణ తెలంగాణ జిల్లాల్లో మాన్సూన్ గాలులు ప్రవేశించాయి. ఉత్తర తెలంగాణలో ఇంకా నైరుతి ప్రవేశించనందున వాయువ్య దిశ నుంచి వేడి గాలులు వీస్తున్నాయి. దీంతో ఈ ప్రాంతంలో హీట్ వేవ్ పరిస్థితులు మరో నాలుగైదు రోజులు కొనసాగుతాయని అధికారులు హెచ్చరిస్తున్నారు. అయితే రానున్న వర్షాల వల్ల ఎండ, ఉక్కపోత నుంచి ప్రజలకు కొంత ఉపశమనం లభించే అవకాశం ఉందని వాతావరణ శాఖ తెలిపింది.

జూలై-ఆగస్టు వర్షపాతంపై ఈ సీజన్ పరిస్థితి ఆధారపడి ఉంటుందని, నీటిని రిజర్వాయర్లు, డ్యామ్‌లలో నిల్వ చేసుకోవాలని వాతావరణ శాఖ అధికారులు సూచించారు. నీరు తక్కువ తీసుకునే పంటలను మాత్రమే ఈ ఏడాది సాగు చేయాలని సలహా ఇచ్చారు.