హైదరాబాద్‌లో నీటి కొరత: అక్టోబర్‌లో 2.45 లక్షల వాటర్ ట్యాంకర్ బుకింగ్‌లు

హైదరాబాద్‌లో మంచినీటి కొరత పెరగడంతో వాటర్ ట్యాంకర్లపై ఆధారపడే పరిస్థితి ఏర్పడింది. ఈ ఏడాది అక్టోబర్ నెలలో నగరంలో దాదాపు 2,45,000 వాటర్ ట్యాంకర్ల బుకింగ్‌లు జరిగాయి. గత ఏడాది ఇదే నెలలో ఈ సంఖ్య 80,000గా ఉంది.

అంటే గత ఏడాదితో పోలిస్తే బుకింగ్‌లు మూడు రెట్లకు పైగా పెరిగాయి. నగరంలో భూగర్భ జల మట్టం క్రమంగా పడిపోవడం ఇందుకు ప్రధాన కారణంగా చెబుతున్నారు. మియాపూర్, కొండాపూర్, గచ్చిబౌలి, కూకట్‌పల్లి, ప్రగతి నగర్, జీడిమెట్ల, కుత్బుల్లాపూర్ ప్రాంతాల్లో నీటి కొరత ఎక్కువగా ఉంది. ఎల్‌బీ నగర్, బోడుప్పల్, ఉప్పల్ ప్రాంతాల్లోనూ ఇదే పరిస్థితి కొనసాగుతోంది.

ఈ ఏడాది జూన్ 9న, ఆగస్టులో రెండుసార్లు, సెప్టెంబర్‌లో ఒకసారి భారీ వర్షాలు కురిశాయి. ఆ వర్షపు నీటిని పూర్తిగా నిల్వ చేసుకునే చర్యలు తీసుకోలేదని ఆరోపణలు వ్యక్తమవుతున్నాయి. జంట జలాశయాలకు వరద నీరు చేరడంతో అధికారులు దాదాపు వారం రోజుల పాటు నీటిని కిందికి వదిలారు.

భూగర్భ జలాల పతనాన్ని ముందుగానే అంచనా వేయకపోవడం, నీటి సరఫరాను మెరుగుపరచకపోవడం వల్ల ఈ పరిస్థితి వచ్చిందని విమర్శలు ఉన్నాయి. డిసెంబర్ నెల నుంచి నీటి మట్టం మరింత తగ్గే అవకాశం ఉందని అంచనా వేస్తున్నారు. ఎండాకాలంలో పరిస్థితి ఎలా ఉంటుందన్నది ప్రశ్నగా మిగిలింది. ట్యాంకర్లకు కూడా నీరు దొరక్కపోవచ్చని ఆందోళన వ్యక్తమవుతోంది. ఈ అంశంపై రాష్ట్ర ప్రభుత్వం స్పందన లభ్యం కాలేదు.