తెలంగాణలో సన్న బియ్యం MRP అమలు కావట్లేదు, ధరలు తగ్గడం లేదు

తెలంగాణ ప్రభుత్వం సన్న బియ్యానికి MRP ఖరారు చేసింది. కానీ వ్యాపారులు ఆ ధరలకు అమ్మడం లేదు. తాము నిర్ణయించిన ఎక్కువ రేట్లకే బియ్యం అమ్ముతున్నారు.

అధికారులు దాడులు చేస్తున్నా వ్యాపారులు వెనక్కి తగ్గడం లేదు. సరిపడా నిల్వలున్న కొందరు మిల్లర్లు, బడా వ్యాపారులు కలిసి కృత్రిమ కొరత సృష్టిస్తున్నారని ఆరోపణలు వస్తున్నాయి. గత వానాకాలంలో సేకరించిన 25 లక్షల టన్నులకు పైగా సన్న బియ్యం ఇప్పటికీ వారి దగ్గరే ఉంది.

ప్రభుత్వ నివేదిక ప్రకారం, సివిల్ సప్లైస్ గోదాముల్లో 10.17 లక్షల మెట్రిక్ టన్నుల బియ్యం ఉంది. మిల్లర్ల దగ్గరున్న 27.13 లక్షల టన్నుల CMR ధాన్యాన్ని మిల్లింగ్ చేస్తే మరో 18.18 లక్షల టన్నుల బియ్యం వస్తుంది. రెండు కలిపి మొత్తం 28.35 లక్షల టన్నులు అవుతుంది.

రేషన్, హాస్టళ్లు, మధ్యాహ్న భోజనానికి నెలకు 2.38 లక్షల టన్నులు అవసరం. ఏడాదికి 28.56 లక్షల టన్నులు కావాలి. అంటే వచ్చే ఏడాది అక్టోబర్ వరకు నిల్వలు సరిపోతాయని అధికారులు నివేదికలో తెలిపారు.

సన్న బియ్యం ధరలపై కథనాలు వెలుగు చూసిన తర్వాత పౌర సరఫరాల శాఖ MRP ఖరారు చేసింది. ఎక్కువ ధరకు అమ్మితే PD యాక్ట్ కింద క్రిమినల్ కేసులు పెడతామని హెచ్చరించింది. అయినా మార్కెట్లో మార్పు రాలేదు.

పౌర సరఫరాలు, ఎన్ఫోర్స్మెంట్, పోలీస్, GST, తూనికలు-కొలతల శాఖలు కలిసి హోల్సేల్ హౌస్లు, రీటేల్ మార్కెట్లు, మిల్లర్ల గోదాములపై తనిఖీలు చేస్తున్నాయి. కానీ తనిఖీలు ఫోటోలకే పరిమితమవుతున్నాయని ఆరోపణలు ఉన్నాయి. అధికారులు వెళ్ళిన కాసేపటికే పాత ధరలకే అమ్మకాలు జరుగుతున్నాయి.

దుకాణదారులు ప్రభుత్వ ధరల బోర్డులకు బదులు తమ రేట్ల బోర్డులనే పెడుతున్నారు. ఇన్ని నిల్వలు ఉన్నప్పుడు రైతు బజార్లలో ప్రత్యేక కౌంటర్ల ద్వారా ప్రభుత్వమే తక్కువ ధరకు ఎందుకు అమ్మడం లేదని వినియోగదారులు ప్రశ్నిస్తున్నారు.

లైసెన్స్లు రద్దు, జైలు శిక్షల వంటి కఠిన చర్యలు తీసుకుంటేనే సిండికేట్లు బద్దలవుతాయని, ధరలు దిగొస్తాయని వారు అంటున్నారు.