హైదరాబాద్‌లో నీటి కొరత: బోర్లు ఎండిపోవడంతో బిల్డర్ల నిర్మాణాలు నిలిచిపోతున్నాయి

హైదరాబాద్‌లో నీటి కొరత నిర్మాణ రంగాన్ని తీవ్రంగా ప్రభావితం చేస్తోంది. నగరంలోని పలు ప్రాంతాల్లో బోర్లు ఎండిపోయాయి. ఉన్న బోర్లలోనూ నీరు రావడం లేదు. దీంతో కాంక్రీట్ పనులు, క్యూరింగ్ రెండూ ఆగిపోతున్నాయని బిల్డర్లు చెబుతున్నారు. ఎల్ నినో ప్రభావంతో భూగర్భ జలాలు అడుగంటడమే ఇందుకు కారణమని వారు పేర్కొంటున్నారు.

అపార్టుమెంట్లు, భారీ భవనాల నిర్మాణాలు చేపట్టిన బిల్డర్లు ఎక్కువ ఇబ్బంది పడుతున్నారు. స్లాబ్ వేసిన తర్వాత నిర్దిష్ట కాలం పాటు తగినంత నీటితో క్యూరింగ్ చేయాలి. అప్పుడే కాంక్రీటుకు పటిష్టత వస్తుంది. ప్రస్తుతం స్లాబులకు సరిగా క్యూరింగ్ చేయలేకపోతున్నామని బిల్డర్లు చెబుతున్నారు. కొన్ని చోట్ల స్లాబులకు ప్రాధాన్యత ఇస్తున్నా గోడలకు క్యూరింగ్ చేయలేకపోతున్నారు. దీంతో కొన్ని ప్రాంతాల్లో నిర్మాణ పనులు తాత్కాలికంగా నిలిచిపోయాయి. నీరు అందుబాటులో ఉన్న రోజుల్లోనే కాంక్రీట్ పనులు చేస్తున్నారు. దీంతో ప్రాజెక్టుల గడువులు పొడిగించాల్సిన పరిస్థితి ఏర్పడుతోంది.

గతంలో నిర్మాణ ప్రదేశాల్లోనే బోర్లు వేసి నీరు వాడుకునేవారు. ఇప్పుడు ఆ బోర్లు పనిచేయడం లేదు. దీంతో ప్రైవేట్ ట్యాంకర్లపై ఆధారపడాల్సి వస్తోంది. 5,000 లీటర్ల ట్యాంకర్‌కు ప్రాంతాన్ని బట్టి ₹2,000 నుంచి ₹3,000 వరకు చెల్లించాల్సి వస్తోందని నిర్మాణదారులు చెబుతున్నారు. రోజుకు ఒకటి రెండు ట్యాంకర్లు అవసరమయ్యే ప్రదేశాల్లో నీటి కోసమే వేల రూపాయలు ఖర్చవుతున్నాయి. నిర్మాణ సామగ్రి ధరలు, కూలీల ఖర్చులతో పాటు ఇది కూడా తోడవడంతో ఖర్చు భారంగా మారుతోంది.

మరోవైపు తాగునీటి వినియోగం తగ్గించేందుకు శుద్ధి చేసిన మురుగు నీటిని (గ్రీన్ వాటర్) నిర్మాణ అవసరాలకు వాడాలని జలమండలి ప్రచారం చేస్తోంది. ఈ నీటిని ట్యాంకర్ల ద్వారా అందించే ఏర్పాటు ఉంది. అయితే గ్రీన్ వాటర్ నాణ్యతపై కొందరు బిల్డర్లు సందేహాలు వ్యక్తం చేస్తున్నారు. కాంక్రీట్ తయారీ, క్యూరింగ్‌కు ఈ నీరు సరిపోతుందా అనే దానిపై సాంకేతిక నిర్ధారణ కావాలని కోరుతున్నారు. నిర్మాణ నాణ్యతపై ఎలాంటి ప్రభావం ఉండదని భరోసా ఇచ్చే పరీక్ష నివేదికలు అందించాలని బిల్డర్లు అంటున్నారు. గ్రీన్ వాటర్ అంత సురక్షితం కాదని కూడా ప్రచారం ఉందని వారు పేర్కొంటున్నారు.

కొత్త బోర్లు వేయడంపై ప్రభుత్వం నిషేధం విధించింది. దీంతో ఇబ్బందులు మరింత పెరిగే అవకాశం ఉందని బిల్డర్లు చెబుతున్నారు. హైదరాబాద్‌లో 15 లక్షల మంది భవన నిర్మాణ కార్మికులు ఉన్నారు. నీటి కొరత ప్రభావం వారిపై పడే అవకాశం ఉందని బిల్డర్లు ఆందోళన వ్యక్తం చేస్తున్నారు. పెద్ద హై రైజ్ భవనాలకు అనుమతులు ఇవ్వద్దని తెలంగాణ రియల్టర్ అసోసియేషన్ ప్రతినిధులు సూచిస్తున్నారు.