రంగారెడ్డి జిల్లాలో ప్రభుత్వ భూముల కబ్జాపై హైడ్రా చర్యలు

రంగారెడ్డి జిల్లాలో ప్రభుత్వ భూముల ఆక్రమణలపై హైడ్రా అధికారులు దృష్టి సారించారు. అబ్దుల్లాపూర్ మెట్టు మండలం మర్రిపల్లి గ్రామంలో 5 ఎకరాల చెరువు సికం భూమిని ఆక్రమించి రెడీ మిక్స్ ప్లాంట్ ఏర్పాటు చేశారని అనంతుల వెంకటేశ్వర్ రెడ్డి, అనంతుల రాజగోపాల్ రెడ్డిలపై ఆరోపణలు వచ్చాయి.

స్థానికుల ఫిర్యాదు మేరకు హైడ్రా సిబ్బంది ఆ అక్రమ నిర్మాణాన్ని కూల్చివేశారు. అలాగే, తట్టి అన్నారం లక్ష్మీ గణపతి కాలనీలో 700 చదరపు గజాల పార్కు స్థలాన్ని కూడా వెంకటేశ్వర్ రెడ్డే ఆక్రమించి అక్రమ నిర్మాణాలు చేపట్టినట్లు విచారణలో తేలింది. హైడ్రా అధికారులు ఆ నిర్మాణాలను తొలగించి స్థలాన్ని కాలనీవాసుల కోసం అప్పగించారు.

గతంలో నుంచి జిల్లాలోని చెరువు సికం భూములు, పార్కు స్థలాలను ఆక్రమించి కొందరు వ్యక్తులు వాణిజ్య కేంద్రాలు ఏర్పాటు చేస్తున్నట్లు వెల్లడైంది. ఈ నేపథ్యంలో హైడ్రా తనిఖీలు ముమ్మరం చేసింది. ప్రభుత్వ ఆస్తుల రక్షణకు హైడ్రా కట్టుబడి ఉందని అధికారులు తెలిపారు.