హైడ్రా నియామకం: సరూర్ నగర్ స్టేడియంలో పరీక్షలకు వేలాది మంది నిరుద్యోగులు

తెలంగాణలోని హైడ్రా సంస్థలో 150 పోస్టుల భర్తీకి నోటిఫికేషన్ విడుదలైంది. 50 డ్రైవర్, 100 డిఆర్ఎఫ్ అసిస్టెంట్ పోస్టులను ఔట్ సోర్సింగ్ ద్వారా భర్తీ చేయనున్నారు. నెలకు రూ.25,000 జీతంతో కూడిన ఈ ఉద్యోగాలకు ఈ రోజు సరూర్ నగర్ ఇండోర్ స్టేడియంలో ఫిజికల్ టెస్ట్లు నిర్వహిస్తున్నారు.

తెల్లవారుజాము నుంచి వివిధ జిల్లాల నుంచి భారీ సంఖ్యలో నిరుద్యోగ యువకులు స్టేడియానికి చేరుకోవడంతో ఉద్రిక్తత నెలకొంది. 150 పోస్టులకు గాను 2000 నుంచి 3000 మంది వరకు అభ్యర్థులు హాజరయ్యారని, కొన్ని అంచనాల ప్రకారం ఆ సంఖ్య 4000 దాకా ఉండొచ్చని అధికారులు తెలిపారు.

పరీక్షల నిర్వహణలో జాప్యంతో పాటు అనుకున్నదానికంటే ఎక్కువ మంది రావడంతో పోలీసులు పరిస్థితిని అదుపు చేయడానికి తీవ్రంగా శ్రమించాల్సి వచ్చింది. అధికారులు రోజుకు 500 మందికి మాత్రమే టోకెన్లు ఇచ్చి ఫిజికల్ టెస్ట్ నిర్వహిస్తున్నారు. ఉదయం ప్రారంభం కావాల్సిన పరీక్షలను మధ్యాహ్నం 3 గంటలకు వాయిదా వేశారు.

ఈ రిక్రూట్మెంట్‌లో 800 మీటర్ల పరుగు 170 సెకన్లలో, 100 మీటర్లు 15 సెకన్లలో పూర్తి చేయాలి. లాంగ్ జంప్, షార్ట్ పుట్ కూడా ఉన్నాయి. ఇప్పటికే టోకెన్ పొందిన 500 మందికి నేడు పరీక్షలు నిర్వహిస్తారు. మిగిలిన రెండు రోజుల పాటు ఇదే విధంగా కొనసాగుతుందని, అవసరమైతే మరో రోజు పొడిగింపు ఉంటుందని ఎస్పీ సుదర్శన్ తెలిపారు.

పోలీసులు భారీ బందోబస్తు ఏర్పాటు చేశారు. అయితే, నిరుద్యోగులను నియంత్రించే క్రమంలో ఒక హైడ్రా అధికారి అసభ్యకర భాషను ఉపయోగించినట్లు ఆడియో బయటకు వచ్చింది. తుది జాబితాలో 150 మందిని ఎంపిక చేస్తారు. మొదటి 500 మందికి భవిష్యత్తులో ప్రాధాన్యత లభించే అవకాశం ఉంది.