తనపై ధిక్కరణ కేసులు భూ కబ్జాదారులు వేసినవే: హైడ్రా కమిషనర్ రంగనాథ్

హైదరాబాద్: హైడ్రా కమిషనర్‌గా తనను తప్పించాలన్న హైకోర్టు ఆదేశాలపై రంగనాథ్ స్పందించారు. తనపై ఉన్న 63 ధిక్కరణ కేసులు భూ కబ్జాదారులు వేసినవేనని, వారికి అడ్డుపడినందుకు ఈ కేసులు పెట్టించారని ఆయన పేర్కొన్నారు.

కమిషనర్‌గా రెండేళ్లలో తాను రాజ్యాంగ స్ఫూర్తితో పనిచేశానని, మార్కెట్ విలువ ప్రకారం లక్షన్నర కోట్ల రూపాయల ప్రభుత్వ ఆస్తులు, చెరువులు, పార్కులు రక్షించామని రంగనాథ్ తెలిపారు. ఆరు చెరువులను పూర్తిగా పునరుద్ధరించగా, మరో 20 చెరువుల పనులు శరవేగంగా కొనసాగుతున్నాయని చెప్పారు.

భూ కబ్జాదారులు తప్పుడు సమాచారంతో న్యాయస్థానాలను తప్పుదోవ పట్టిస్తున్నారని, లోతుకుంటలో శాంతా శ్రీరామ్ సంస్థ 10 వేల కోట్ల ప్రభుత్వ భూమిని కొట్టేయాలని చూసిందని ఆరోపించారు. సేవ్ ద రాక్ సొసైటీ, స్థానికుల ఫిర్యాదులపై హైడ్రా జోక్యం చేసుకుందని వివరించారు. బతుకమ్మకుంట చెరువు, సింగరేణి కార్మికుల ప్లాట్ల కబ్జాకు సంబంధించిన ఘటనల్లోనూ భూమాఫియాను అడ్డుకున్నట్లు తెలిపారు.

న్యాయస్థానాలపై తనకు పూర్తి నమ్మకం ఉందని, చట్టబద్ధంగా ధిక్కరణ పిటిషన్లను ఎదుర్కొంటానని రంగనాథ్ స్పష్టం చేశారు.