హైడ్రా ఫిజికల్ టెస్ట్: సరూర్ నగర్ స్టేడియంలో అభ్యర్థుల రద్దీ, ఏర్పాట్లపై ఆగ్రహం

హైడ్రా విడుదల చేసిన 150 ఉద్యోగాల భర్తీలో భాగంగా నేడు (శుక్రవారం) సరూర్ నగర్ స్టేడియంలో ఫిజికల్ టెస్ట్ నిర్వహించారు. అయితే, వివిధ జిల్లాల నుంచి భారీ సంఖ్యలో అభ్యర్థులు చేరుకోవడంతో స్టేడియం వద్ద అరాచక పరిస్థితులు నెలకొన్నాయి.

పోస్టులు 150 మాత్రమే ఉన్నా, దాదాపు 2000 నుంచి 3000 మంది వరకు అభ్యర్థులు హాజరయ్యారని అంచనా. కొందరు అభ్యర్థులు గోడలు దూకి స్టేడియం లోపలికి ప్రవేశించడానికి ప్రయత్నించారు. పోలీసు సిబ్బంది పరిస్థితిని అదుపు చేయడంలో తీవ్రంగా ఇబ్బంది పడ్డారు.

ఉదయం 5 గంటలకే ప్రారంభం కావాల్సిన టెస్ట్ కోసం చాలా మంది తెల్లవారుజామున 3:30-4:00 గంటలకే చేరుకున్నారు. తాగునీరు, టాయిలెట్లు వంటి కనీస సౌకర్యాలు లేకపోవడంతో అభ్యర్థులు తీవ్ర ఆగ్రహం వ్యక్తం చేశారు. క్యూ లైన్లలో గంటల తరబడి వేచి ఉండటంతో చాలామంది అలసిపోయారు.

అధికారులు సమీక్షించిన తర్వాత, ఒకేసారి అందరికీ టెస్ట్ నిర్వహించడం కష్టమని భావించి, కొందరికి ప్రత్యామ్నాయ తేదీలు కేటాయించారు. సంబంధిత సర్టిఫికెట్ల ఆధారంగా రేపు, ఎల్లుండి లేదా సాయంత్రం 5 గంటలకు మళ్లీ రావాలని చెప్పారు. ఎంపిక ప్రక్రియలో 800 మీటర్ల పరుగు, 100 మీటర్ల పరుగు, లాంగ్ జంప్, షాట్‌పుట్ వంటి ఈవెంట్లు ఉన్నాయి. హైడ్రా ఇంతకు ముందు DRF పోస్టులు 100, డ్రైవర్ పోస్టులు 50 ప్రకటించింది.