మంచిర్యాల జిల్లాలో అక్రమ ఇసుక తరలింపు.. జేసీబీ, ట్రాక్టర్లు సీజ్

మంచిర్యాల జిల్లా చెన్నూరు మండలం కత్తరసాల వాగు వద్ద అక్రమంగా ఇసుక తరలిస్తున్నారన్న సమాచారంతో మైనింగ్ అధికారులు దాడులు చేశారు. ఈ దాడుల్లో ఒక జేసీబీ, రెండు ఇసుక ట్రాక్టర్లను స్వాధీనం చేసుకున్నారు.

స్థానిక సర్పంచ్ భర్త నిబంధనలకు విరుద్ధంగా ఇసుక తరలిస్తున్నట్లు అధికారులు గుర్తించారు. ఆయన అధికారులతో వాగ్వాదానికి దిగినట్లు తెలిసింది. పోలీసుల సహాయంతో మైనింగ్ సిబ్బంది వాహనాలను సీజ్ చేశారు.

సీజ్ చేసిన వాహనాలను చెన్నూరు పోలీస్ స్టేషన్‌కు తరలించారు. అక్రమ ఇసుక రవాణాపై చట్టపరమైన కఠిన చర్యలు తీసుకుంటామని అధికారులు స్పష్టం చేశారు.

ఈ ఘటనపై స్థానిక మంత్రి గడ్డం వివేక్ వెంకటస్వామి స్పందించారు. పార్టీ పేరు చెప్పి అక్రమాలకు పాల్పడితే ఉపేక్షించేది లేదని ఆయన తెలిపారు. అక్రమ తవ్వకాలకు పాల్పడిన వారు ఎంతటి వారైనా చట్ట ప్రకారం చర్యలు తీసుకుంటామని మైనింగ్ అధికారులకు ఆదేశించినట్లు సమాచారం.