వర్షాలపై IMD శుభవార్త: రేపు కేరళకు చేరనున్న నైరుతి ఋతుపవనాలు

నైరుతి ఋతుపవనాల కోసం ఎదురుచూస్తున్న వేళ భారత వాతావరణ శాఖ (IMD) శుభవార్త అందించింది. వర్షభావ పరిస్థితులపై ఆందోళన పెరుగుతున్న నేపథ్యంలో రేపు కేరళను నైరుతి ఋతుపవనాలు పలకరిస్తాయని IMD అంచనా వేసింది.

ఈ ఏడాది ఋతుపవనాలు ముందస్తు సంకేతాలు పంపాయి. మే 16 నాటికే అండమాన్ నికోబార్ దీవులను తాకి అక్కడి నుంచి విస్తరించడం ప్రారంభించాయి. దీంతో మే 26 నాటికి కేరళలో తొలకరి వర్షాలు పడతాయని వాతావరణ శాఖ అంచనా వేసింది. అయితే స్వల్ప ఆలస్యం కారణంగా అంచనాలు కొద్దిగా మారాయి.

కేరళలో ఋతుపవనాలు తాకిన తర్వాత తెలుగు రాష్ట్రాలకు విస్తరిస్తాయని అధికారులు వెల్లడించారు. తెలుగు రాష్ట్రాల రైతులు వ్యవసాయ పనులకు సిద్ధపడినప్పటికీ, అంచనాలు మారడంతో మరికొంత వేచిచూడాల్సిన పరిస్థితి ఏర్పడింది.

ఈ సీజన్‌లో సాధారణం కంటే తక్కువ వర్షపాతం నమోదవుతుందని IMD ఇప్పటికే అంచనా వేసింది. మధ్య జిల్లాల్లో సాధారణం కంటే కొంచెం తక్కువ వర్షపాతం కనిపిస్తుండగా, అన్ని ప్రాంతాలూ ఒకేలా ఉండవని వాతావరణ నిపుణులు స్పష్టం చేశారు. రాష్ట్రంలో కొన్ని జిల్లాలకు తక్కువ వర్షపాతం నమోదవుతుందని, మిగతా చోట్ల సాధారణ స్థాయిలో లేదా కొంచెం ఎక్కువగా వర్షాలు పడే అవకాశం ఉందని పేర్కొన్నారు.

ఋతుపవనాలు బలహీనపడే అవకాశాలు కనిపిస్తున్నాయని, ఇందుకు ఎల్నినో ప్రభావమే కారణమని వాదన వినిపిస్తోంది. అయినప్పటికీ దీర్ఘకాలిక సగటు వర్షపాతంతో పోలిస్తే మరీ ఆందోళన చెందాల్సిన అవసరం లేదని నిపుణులు అభిప్రాయపడుతున్నారు. అన్ని వర్గాల్లో ఖరీఫ్ సీజన్‌పై ఆందోళన కనిపిస్తోంది.