ఏపీలో నేడు ఉరుములు, మెరుపులతో భారీ వర్షాలు: IMD హెచ్చరిక

ఈ రోజు ఆంధ్రప్రదేశ్‌లోని పలు జిల్లాల్లో ఉరుములు, మెరుపులతో కూడిన భారీ వర్షాలు కురుస్తాయని భారత వాతావరణ విభాగం (IMD) హెచ్చరించింది. శ్రీకాకుళం, పార్వతీపురం మన్యం, కృష్ణా, ఎన్టీఆర్, బాపట్ల, ప్రకాశం, నెల్లూరు, నంద్యాల, తిరుపతి జిల్లాలతో పాటు పోలవరం ప్రాంతంలో భారీ వర్షాలు, పిడుగులు పడే అవకాశం ఉంది. తీరం వెంబడి గంటకు 40-50 కిలోమీటర్ల వేగంతో ఈదురు గాలులు వీచనున్నాయని కూడా తెలిపింది.

ఏపీ విపత్తుల నిర్వహణ సంస్థ అప్రమత్తంగా ఉండాలని ప్రజలకు అలర్ట్ జారీ చేసింది. ఉరుములు, మెరుపుల సమయంలో బహిరంగ ప్రదేశాల నుంచి సురక్షిత ప్రాంతాలకు వెళ్లాలని, చెట్ల కింద నిలవొద్దని, విద్యుత్ స్తంభాలు, తెగిపడిన వైర్లకు దూరంగా ఉండాలని సూచించారు. లోతట్టు ప్రాంతాల ప్రజలను ముందస్తుగా గుర్తించి, అవసరమైతే తరలించేందుకు NDRF, SDRF బృందాలు సిద్ధంగా ఉన్నాయి.

రాష్ట్ర ప్రభుత్వ ప్రధాన కార్యదర్శి లోటు వర్షపాతంపై సమీక్ష నిర్వహించారు. ఈ సమావేశంలో రైతులకు నిరంతర సాంకేతిక సలహాలు అందిస్తూ, తక్కువ కాలంలో చేతికొచ్చే, తక్కువ నీటితో పండే ప్రత్యామ్నాయ పంటల సాగును ప్రోత్సహించాలని నిర్ణయించారు. రాబోయే ఖరీఫ్ సీజన్ల కోసం సాగునీటి నిల్వలు, రిజర్వాయర్ల నిర్వహణపై కూడా ప్రణాళికలు సిద్ధం చేస్తున్నారు.

ఇటీవల అల్లూరి సీతారామరాజు జిల్లా పాడేరు, చింతపల్లి, లంబసింగిలో, అనకాపల్లి జిల్లా నర్సీపట్నంలో భారీ వర్షాలు కురిశాయి. దీంతో వాగులు ప్రవహిస్తున్నాయి. వాతావరణ శాఖ నిపుణులు ఈ సీజన్లో ఎల్నినో ప్రభావంతో మొత్తం వర్షపాతం తక్కువగా ఉండొచ్చని అంచనా వేస్తున్నారు. ప్రజలు అధికారిక హెచ్చరికలను పాటించాలని అధికారులు కోరారు.