తెలంగాణలో 7 రోజులు భారీ వర్షాలు: IMD హెచ్చరిక

తెలంగాణలో రాబోయే వారం రోజులు భారీ వర్షాలు కురిసే అవకాశం ఉందని వాతావరణ శాఖ (IMD) హెచ్చరిక జారీ చేసింది. ఉపరితల ఆవర్తనం, ఋతుపవన ధ్రోణి ప్రభావంతో రాష్ట్రవ్యాప్తంగా మోస్తరు నుంచి భారీ వర్షాలు, గంటకు 30-40 కిలోమీటర్ల వేగంతో ఈదురుగాలులు, ఉరుములు, మెరుపులతో కూడిన వానలు ఉంటాయని తెలిపింది. ఈ నెల 13 తర్వాత వర్ష తీవ్రత మరింత పెరిగే అవకాశం ఉందని అధికారులు చెప్పారు.

ఇప్పటికే ఉత్తర తెలంగాణ జిల్లాల్లో వర్షాలు కురుస్తూ వాగులు, చెరువులు ఉధృతంగా ప్రవహిస్తున్నాయి. జనగామ జిల్లాలోని పాలకుర్తి, కొడకండ్ల, దేవరూపుల మండలాల్లో తెల్లవారుజామున ఎడతెరిపిలేని వర్షం కురిసింది. హనుమకొండ జిల్లా భీమదేవరపల్లి, ఎలకతుర్తి, కమలాపూర్ మండలాల్లో కూడా వాన పడింది. మహబూబాబాద్ జిల్లా తొర్రూరు, పెద్దవంగ, దంతాలపల్లి, నరసింహులపేట మండలాల్లో వర్షం కురిసింది. నిజామాబాద్ జిల్లాలో వాగులు పొంగిపొర్లడంతో కాలనీల్లోకి వరద నీరు చేరి లోతట్టు ప్రాంతాలు ముంపునకు గురయ్యాయి. సిరికొండ మండలంలో 132కెవీ, 33కెవీ సబ్స్టేషన్ యార్డ్‌లోకి వరద నీరు చేరడంతో ఆపరేటర్లు తీవ్ర ఇబ్బందులు పడుతున్నారు.

హైదరాబాద్ నగరంలో కూడా పలు ప్రాంతాల్లో వర్షం కురిసింది. జూబ్లీ హిల్స్, బంజారా హిల్స్, ఫిల్మ్ నగర్, అమీర్పేట్ మైత్రివనంలో వాన పడగా, బషీర్ బాగ్, ఆబిడ్స్, కోటి, హిమాయత్ నగర్, బేగం బజార్, ముషీరాబాద్, ఆర్టీసీ క్రాస్ రోడ్ తదితర ప్రాంతాల్లో ట్రాఫిక్ జామ్ అయింది. ఓల్డ్ సిటీ లోని చాంద్రయాన గుట్ట, కంచన్ బాగ్, సంతోష్ నగర్, చత్రినాక ప్రాంతాల్లో జల్లులు పడ్డాయి.

ఎగువ ప్రాంతాల్లో కురుస్తున్న వర్షాలతో ప్రాజెక్టులకు వరద ఇన్‌ఫ్లో కొనసాగుతోంది. నిర్మల్ జిల్లా కడం ప్రాజెక్టుకు 2292 క్యూసెక్కుల ఇన్‌ఫ్లో వస్తుండగా 100 క్యూసెక్కులు అవుట్‌ఫ్లో జరుగుతోంది. కడం నుంచి పెద్దపల్లి జిల్లాలోని ఎల్లంపల్లి ప్రాజెక్టుకు 1287 క్యూసెక్కులు చేరుతోంది. నందిమేడారం పంప్ హౌస్ నుంచి మిడ్‌మానేరుకు నీరు విడుదల చేస్తున్నారు. రాజన్న సిరిసిల్ల జిల్లాలో మిడ్‌మానేరు ప్రాజెక్టుకు 13553 క్యూసెక్కుల ఇన్‌ఫ్లో వస్తుండగా, ప్రాజెక్టు నిండేందుకు 27.55 టీఎంసిలు కెపాసిటీ ఉండగా ప్రస్తుతం 19 టీఎంసిల నీరు నిల్వ ఉంది. మహబూబ్‌నగర్ జిల్లాలో జూరాల ప్రాజెక్టుకు 2,20,000 క్యూసెక్కుల ఇన్‌ఫ్లో రావడంతో 26 గేట్లు ఎత్తి 2,000 క్యూసెక్కుల నీటిని విడుదల చేస్తున్నారు. నీటిమట్టం 317.62 మీటర్లకు చేరుకుంది, పూర్తి స్థాయి 318.516 మీటర్లు. శ్రీశైలం జలాశయానికి 26355 క్యూసెక్కులు ఇన్‌ఫ్లో వస్తుండగా, కుడి, ఎడమ కాలువల నుంచి 30,518 క్యూసెక్కుల అవుట్‌ఫ్లో కొనసాగుతోంది.