తెలంగాణలో పలు జిల్లాల్లో వర్షాలు; వాతావరణ శాఖ హెచ్చరిక జారీ

తెలంగాణలోని పలు జిల్లాల్లో నేడు, రేపు వర్షాలు కురుస్తాయని వాతావరణ శాఖ (IMD) హెచ్చరిక జారీ చేసింది. ఉత్తర తెలంగాణలోని ఆదిలాబాద్, ఆసిఫాబాద్, నిర్మల్, సిరిసిల్ల, కరీంనగర్, పెద్దపల్లి, భూపాలపల్లి, కామారెడ్డి జిల్లాల్లో ఉదయం, సాయంత్రం వేళల్లో తేలికపాటి నుంచి మోస్తరు వర్షాలు పడే అవకాశం ఉన్నట్లు వాతావరణ శాఖ తెలిపింది.

మధ్యాహ్నం తర్వాత సంగారెడ్డి, వికారాబాద్, రంగారెడ్డి, నాగర్‌కర్నూల్, మహబూబ్‌నగర్ జిల్లాలకు వర్షాలు విస్తరిస్తాయని హెచ్చరికలో పేర్కొంది. అదేవిధంగా సిద్దిపేట, జనగామ, హనంకొండ, వరంగల్, పెద్దపల్లి, భూపాలపల్లి, ములుగు, భద్రాద్రి కొత్తగూడెం, ఖమ్మం, సూర్యాపేట, నల్గొండ జిల్లాల్లో రాత్రి వర్షాలు కురుస్తాయి. హైదరాబాద్‌లోని పలు ప్రాంతాల్లో సాయంత్రం వాన పడే అవకాశం ఉందని కూడా వెల్లడించింది.

నిన్న (సోమవారం) రాష్ట్రవ్యాప్తంగా పలు చోట్ల వర్షం నమోదైంది. ములుగు జిల్లా ఏటూరు నాగారంలో 11 సెం.మీ., వరంగల్‌లో 7 సెం.మీ., హనుమకొండలో 4-5 సెం.మీ., జోగుళాంబ గద్వాల, నాగర్‌కర్నూల్, సంగారెడ్డి, నల్గొండ ప్రాంతాల్లో 3-4 సెం.మీ. వర్షపాతం నమోదైంది. హైదరాబాద్‌లోని షేర్‌లింగంపల్లిలో 2 సెం.మీ. వర్షం పడింది.

దాదాపు 20 నుంచి 25 రోజుల విరామం తర్వాత రాష్ట్రంలో మళ్లీ వర్షాలు కురుస్తున్నాయి. బంగాళాఖాతంలో ఒడిశా-ఛత్తీస్‌గఢ్ తీరాన ఏర్పడిన అల్పపీడనం కారణంగా ఈ వర్షాలు కురుస్తున్నాయని వాతావరణ శాఖ వివరించింది. రాబోయే 24 గంటల పాటు మేఘావృతమైన వాతావరణం కొనసాగుతుందని, తేలికపాటి నుంచి మోస్తరు వర్షాలు అక్కడక్కడ కురుస్తాయని హెచ్చరించింది.