తెలంగాణకు IMD హెచ్చరిక: మూడు రోజుల పాటు ఉరుములతో భారీ వర్షాలు, గాలులు

వచ్చే మూడు రోజుల పాటు తెలంగాణలో ఉరుములు, మెరుపులతో కూడిన భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరించింది. గంటకు 50 కిలోమీటర్ల వేగంతో ఈదురుగాలులు వీచే అవకాశం ఉంది.

విదర్భ, మధ్యప్రదేశ్ ప్రాంతంపై ఏర్పడిన వాయుగుండం వాయువ్య దిశగా కదులుతూ, వచ్చే 24 గంటల్లో అల్పపీడనంగా బలహీనపడుతుందని హైదరాబాద్ వాతావరణ కేంద్రం తెలిపింది. నైరుతి రుతుపవనాలు చురుగ్గా కదులుతున్నాయని, వర్షాలకు అనుకూలమైన పరిస్థితులు ఏర్పడ్డాయని పేర్కొంది.

ఇప్పటికే గత రెండు రోజుల్లో రాష్ట్రవ్యాప్తంగా 96 మండలాల్లో భారీ నుంచి అతిభారీ వర్షపాతం నమోదయింది. అత్యధికంగా జగిత్యాల జిల్లా బీరపూర్ మండలంలో 14 సెంటీమీటర్ల వర్షపాతం నమోదయింది. ఆదిలాబాద్, జగిత్యాల, కొమరంభీం ఆసిఫాబాద్ జిల్లాల్లో అత్యంత భారీ వర్షాలు కురిశాయి.

అదేవిధంగా, మంచిర్యాల, నిజామాబాద్, పెద్దపల్లి, కరీంనగర్, కామారెడ్డి, జయశంకర్ భూపాలపల్లి, నిర్మల్, వరంగల్ జిల్లాల్లో సాధారణం కంటే ఎక్కువ వర్షపాతం నమోదైనట్లు అధికారులు తెలిపారు. ప్రజలు అప్రమత్తంగా ఉండాలని వాతావరణ శాఖ సూచించింది.