భారత నౌకాదళం మూడు దేశీయ యుద్ధ నౌకలను కమిషన్ చేసింది

భారత నౌకాదళం కోల్‌కతాలోని గార్డెన్ రిచ్ షిప్ బిల్డర్స్ & ఇంజనీర్స్ (GRSE) నిర్మించిన మూడు యుద్ధ నౌకలను ఒకేసారి కమిషన్ చేసింది. వీటిలో INS దునగిరి, INS సంశోధక్, INS ఆగ్రై ఉన్నాయి.

INS దునగిరి ప్రాజెక్టు 17A కింద నిర్మించిన స్టెల్త్ గైడెడ్ మిసైల్ ఫ్రిగేట్. ఇది బ్రహ్మోస్ సూపర్‌సోనిక్ క్రూయిజ్ మిసైల్స్, మీడియం రేంజ్ సర్ఫేస్ టు ఎయిర్ మిసైల్స్ కలిగి ఉంటుంది. శత్రు రేడార్‌లకు చిక్కకుండా సముద్రంలో ఆపరేట్ చేయగల ఈ నౌక సుదూర ప్రాంతాల్లో శత్రు నౌకలపై దాడి చేయగలదు.

INS సంశోధక్ సముద్ర గర్భ మ్యాపింగ్ కోసం రూపొందించిన సర్వే నౌక. ఇందులో ఆటోనమస్ అండర్ వాటర్ వెహికల్స్, రిమోట్‌గా ఆపరేటెడ్ వెహికల్స్, మల్టీ బీమ్ ఎకో సౌండర్లు అమర్చారు. దీని సమాచారం సురక్షిత నావిగేషన్, ఓషన్ రీసెర్చ్, తీరప్రాంత అభివృద్ధికి దోహదపడుతుంది.

INS ఆగ్రై ఒక యాంటీ సబ్‌మెరైన్ కోర్వెట్స్. తీర ప్రాంత జలాల్లో శత్రు సబ్‌మెరైన్లను గుర్తించి నిరోధించే సామర్థ్యం దీనికి ఉంది. ఇది లైట్ వెయిట్ టార్పెడోలు, స్వదేశీ యాంటీ సబ్‌మెరైన్ రాకెట్ లాంచర్లతో ఆయుధాలను కలిగి ఉంది.

ఈ మూడు నౌకల తయారీలో 75 శాతానికి పైగా స్వదేశీ పరిజ్ఞానం ఉపయోగించారు. 200కు పైగా భారతీయ సూక్ష్మ, చిన్న, మధ్యతరహా పరిశ్రమలు ఇందులో భాగస్వామ్యమయ్యాయి. హిందూ మహాసముద్రం, అరేబియా సముద్రం, బంగాళాఖాతంలో పెరుగుతున్న చైనా, పాకిస్తాన్ నౌకా కార్యకలాపాలను దృష్టిలో పెట్టుకుని ఈ నౌకలను ఒకే రోజు కమిషన్ చేయడం భారత సముద్ర రక్షణ వ్యూహంలో భాగంగా నిపుణులు భావిస్తున్నారు.