సామాజిక న్యాయంపై కల్వకుంట్ల కవిత ప్రసంగం: '100 రొట్టెలు' ఉదాహరణ

కల్వకుంట్ల కవిత తాజాగా ఓ బహిరంగ సభలో సామాజిక న్యాయం అంశంగా ప్రసంగించారు. ఆకలితో ఉన్న 100 మందికి 100 రొట్టెలు ఉంటే, అందరికీ ఒక రొట్టె ఇవ్వడమే ధర్మమని ఆమె వివరించారు.

అయితే, వాస్తవ పరిస్థితి వేరేలా ఉందని ఆమె అన్నారు. 100 రొట్టెలను 10 మంది బలమైన వ్యక్తులు 90 రొట్టెలు తీసుకుంటే, బలహీనమైన 90 మంది 10 రొట్టెలు పంచుకుని తినే పరిస్థితి నెలకొందని ఉదాహరించారు. ఇది న్యాయం కాదని, ధర్మం కాదని అన్నారు.

కవిత తన ప్రసంగంలో తాను అగ్రవర్ణంలో పుట్టినా, అనగారిన వర్గాలకు అండగా ఉంటానని చెప్పారు. తన జీవితం వారి సాధికారతకే అంకితం చేశానని ప్రకటించారు.

గౌతమ బుద్ధుడు, సాహు మహారాజ్, ఫూలే, అంబేద్కర్ వంటి నాయకులు సామాజిక న్యాయం కోసం చేసిన కృషిని ఈ సందర్భంగా గుర్తు చేశారు. తెలంగాణలో సామాజిక అన్యాయం ఇంకా కొనసాగుతోందని, దాని తొలగింపు దిశగా కృషి చేయాలని పిలుపునిచ్చారు.

అగ్రవర్ణాల వారు సామాజిక న్యాయాన్ని తమకు వ్యతిరేకంగా భావించవద్దని ఆమె విజ్ఞప్తి చేశారు. ఈ సభలో పెద్ద సంఖ్యలో ప్రజలు పాల్గొన్నారు.