యశ్వంత్ వర్మపై మూడు ఆరోపణలు రుజువైనట్లు విచారణ కమిటీ నివేదిక

జస్టిస్ యశ్వంత్ వర్మ అధికారిక నివాసంలో లభ్యమైన నగదుపై విచారణ కమిటీ నివేదిక సమర్పించింది.

నగదు నిల్వలకు సంబంధించి న్యాయమూర్తి ఇచ్చిన వివరణ సంతృప్తికరంగా లేదని కమిటీ పేర్కొంది.

ఢిల్లీలోని ఆయన నివాసంలోని అవుట్ హౌస్ ప్రాంగణంలో అగ్ని ప్రమాదం జరిగింది. అగ్నిమాపక సిబ్బంది మంటలను ఆరిపేసిన తర్వాత కాలిన, సగం కాలిన 500 రూపాయల నోట్ల కట్టలు చెల్లాచెదురుగా కనిపించాయి.

ఈ ఘటనపై సుప్రీంకోర్టు ముగ్గురు సీనియర్ న్యాయమూర్తులతో విచారణ కమిటీ ఏర్పాటు చేసింది. కమిటీ దాదాపు 55 మంది సాక్షులను విచారించింది. అగ్నిమాపక సిబ్బంది, పోలీసు అధికారుల వాంగ్మూలాలను నమోదు చేసింది.

నగదు ఎక్కడి నుంచి వచ్చింది అనే ప్రశ్నకు జస్టిస్ వర్మ సరైన ఆధారాలు ఇవ్వలేకపోయారు. నివేదికలో మూడు ప్రధాన ఆరోపణలు రుజువైనట్లు కమిటీ పేర్కొంది.

అవి ఇంట్లో లెక్క చూపని భారీ నగదు ఉంచడం, ఆధారాలు మాయం చేసేందుకు ప్రయత్నించడం, విచారణలో పొంతన లేని సమాధానాలు ఇవ్వడం. విచారణ కమిటీ తన నివేదికను సుప్రీంకోర్టుకు సమర్పించింది.