అంతర్జాతీయ యోగా దినోత్సవం 2026: ఉండవల్లి గుహల్లో సీఎం చంద్రబాబు హాజరు; హైదరాబాద్‌లో కౌంట్ డౌన్

రేపు అంతర్జాతీయ యోగా దినోత్సవం సందర్భంగా ఆంధ్రప్రదేశ్, తెలంగాణల్లో విస్తృత ఏర్పాట్లు జరుగుతున్నాయి.

ఏపీ ముఖ్యమంత్రి చంద్రబాబు నాయుడు అమరావతి క్యాంప్ ఆఫీస్‌లో యోగా గురువు బాబా రామ్‌దేవ్‌తో సమావేశమయ్యారు. ఉండవల్లి గుహల్లో నిర్వహించే ‘యోగాంధ్ర-2026’ కార్యక్రమం ఏర్పాట్లపై చర్చించారు. ఈ కార్యక్రమానికి సీఎం చంద్రబాబు ముఖ్య అతిథిగా హాజరుకానున్నారు. బాబా రామ్‌దేవ్ ఉండవల్లిలోని అనంత పద్మనాభ స్వామి ఆలయాన్ని దర్శించుకున్నారు. విద్యార్థులతో కలిసి యోగాసనాలు చేశారు.

రాష్ట్రవ్యాప్తంగా యోగా దినోత్సవ కార్యక్రమాలను ప్రభుత్వం నిర్వహిస్తోంది. కేంద్రం కూడా దేశవ్యాప్తంగా ఘనంగా యోగా డే నిర్వహిస్తోంది.

సికింద్రాబాద్ పరేడ్ గ్రౌండ్స్‌లో 24 గంటల కౌంట్ డౌన్ కార్యక్రమం జరిగింది. గవర్నర్ శివప్రతాప్ శుక్లా, మాజీ ఉపరాష్ట్రపతి ఎం.వెంకయ్య నాయుడు, కేంద్ర మంత్రి కిషన్ రెడ్డి, మాజీ గవర్నర్ బండారు దత్తాత్రేయ, ఎంపీ లక్ష్మణ్, బీజేపీ రాష్ట్ర అధ్యక్షుడు రామచంద్రరావు సహా పలువురు ఈ కార్యక్రమంలో పాల్గొన్నారు. హైదరాబాద్, పరిసర జిల్లాల యోగా నిర్వాహకులు, ఇన్‌స్ట్రక్టర్లు, ఉపాధ్యాయులు, విద్యార్థులు యోగాసనాలు వేశారు.