ఖమ్మంలో అంతర్రాష్ట్ర దొంగ అరెస్ట్.. ₹32 లక్షల బంగారం రికవరీ

ఖమ్మం జిల్లా మధిర మండలంలో తాళం వేసిన ఇళ్లను లక్ష్యంగా చేసుకుంటున్న ఓ అంతర్రాష్ట్ర దొంగను పోలీసులు అరెస్ట్ చేశారు. నిందితుడి నుంచి సుమారు 32 లక్షల రూపాయల విలువైన బంగారు, వెండి ఆభరణాలు స్వాధీనం చేసుకున్నట్లు పోలీసులు తెలిపారు.

మధిర మండలం ఆత్కూరు గ్రామానికి చెందిన ఈ యువకుడు జల్సాలకు అలవాటు పడి చోరీలకు పాల్పడుతున్నట్లు విచారణలో తేలింది. ఇతనిపై గతంలో 22 చోరీ కేసులు నమోదయ్యాయి. పలుమార్లు జైలుకు వెళ్లి బెయిల్‌పై బయటకు వచ్చినట్లు పోలీసులు పేర్కొన్నారు.

నిన్న సాయంత్రం టూ టౌన్ సీఐ, సిబ్బంది వాహన తనిఖీ చేస్తుండగా, ఒక హోటల్ సమీపంలో అనుమానాస్పదంగా తిరుగుతున్న యూసుబ్ అనే వ్యక్తిని పట్టుకున్నారు. ఫింగర్ ప్రింట్ పరికరంతో గుర్తింపు నిర్ధారించడంతో అతనిపై 22 కేసుల వివరాలు బయటపడ్డాయి.

నిందితుడి వద్ద 25 తులాల బంగారం స్వాధీనం చేసుకోగా, అతడు ఇచ్చిన సమాచారం ప్రకారం తిరుమూర్ ప్రాంతంలో మరో 6 తులాల బంగారం లభించింది. మొత్తం 32 లక్షల విలువైన ఆభరణాలు రికవరీ అయినట్లు పోలీసులు తెలిపారు. బంగారాన్ని కొంత ఫైనాన్స్ సంస్థలో తాకట్టు పెట్టినట్లు గుర్తించారు.

నిందితుడిని కోర్టులో ప్రవేశపెట్టి రిమాండ్‌కు తరలించనున్నట్లు పోలీసులు వెల్లడించారు.