ఖమ్మం: అంతర్రాష్ట్ర గంజాయి రాకెట్ ఛేదన; 200 కేజీల డ్రగ్స్ స్వాధీనం

ఖమ్మం జిల్లా కొనిజర్ల వద్ద పోలీసులు అంతర్రాష్ట్ర గంజాయి స్మగ్లింగ్ ముఠాను అరెస్టు చేశారు. ఈ ఆపరేషన్‌లో ₹1 కోటి విలువైన 200 కిలోల పొడి గంజాయి స్వాధీనం చేశారు.

ఈగల్ ఫోర్స్ పోలీసులు స్థానిక ఖమ్మం కమిషనరేట్ పోలీసులతో కలిసి ఈ దాడి చేశారు. ముఠా నెట్వర్క్‌పై 18 నెలలుగా నిఘా పెట్టి, నిందితుల కాల్స్, ప్రయాణాలు, గంజాయి సరఫరా రూట్లను నిరంతరం ట్రాక్ చేశారు.

స్మగ్లర్లు వస్తున్న వాహనాన్ని సరిహద్దు వద్ద అడ్డుకోగా, పోలీసులను చూసి వారు పారిపోయేందుకు ప్రయత్నించారు. అయితే పోలీసులు వారిని చాకచక్యంగా అదుపులోకి తీసుకున్నారు.

వాహనం తనిఖీ చేయగా 200 కిలోల డ్రై గంజాయి బయటపడింది. నిందితుల వద్ద నుంచి ఏడు మొబైల్ ఫోన్లు, ₹2,800 నగదు, స్మగ్లింగ్‌కు వాడిన రెండు వాహనాలు స్వాధీనం చేసుకున్నారు.

ముఠా ప్రధాన సూత్రధారి ప్రభు, సప్లయర్ దేవి సింగ్ పరారీలో ఉన్నారు. వారి కోసం ప్రత్యేక పోలీసు బృందాలు పొరుగు రాష్ట్రాల్లో గాలింపు చేస్తున్నాయి.