రంగారెడ్డి: అంతర్రాష్ట్ర చోరుడు ముకేష్ చౌదరి అరెస్టు, బంగారం స్వాధీనం

రంగారెడ్డి జిల్లా ఆదిబట్లలో పోలీసులు అంతర్రాష్ట్ర చోరుడు ముకేష్ చౌదరిని అరెస్టు చేశారు. కూకట్‌పల్లిలోని సాయిరామ్ బాయ్స్ హాస్టల్‌లో ఉంటూ ఇతను దొంగతనాలు చేస్తున్నట్లు పోలీసులు తెలిపారు.

పోలీసులు వాహన తనిఖీల సందర్భంగా ఇతనిని అదుపులోకి తీసుకున్నారు. వివరాలు అడిగితే సరైన సమాధానం చెప్పకపోవడంతో విచారించగా, అంతర్రాష్ట్ర హౌస్ బ్రేకింగ్ దొంగగా గుర్తించారు. ముకేష్ చౌదరి (35) రాజస్థాన్‌ వాసి.

అతని నుంచి మూడు తులాల బంగారం, 30 తులాల వెండి, సెల్‌ఫోన్, బైక్ స్వాధీనం చేసుకున్నారు. ఇప్పటికే 27 కేసులు నమోదైన ఈ నేరస్థుడు, పీడీ యాక్ట్ కింద చాలాసార్లు జైలుకు వెళ్లి వచ్చినట్లు పోలీసులు వెల్లడించారు.

చోరీ జరిగిన ప్రాంతంలో మూడు నాలుగు రోజుల పాటు సీసీ కెమెరాలను పరిశీలించి క్రైమ్ స్టాఫ్ నిందితుడిని పట్టుకున్నట్లు అధికారులు తెలిపారు.