ట్రైనీ IPS ఉదయ్ కృష్ణారెడ్డి కస్టడీ విచారణలో నోరు మెదపలేదు; మరో కస్టడీకి పోలీసుల పిటిషన్

ట్రైనీ ఐపిఎస్ ఉదయ్ కృష్ణారెడ్డిపై తోటి ట్రైనీ ఐపిఎస్ పై లైంగిక వేదింపుల ఆరోపణల కేసులో పోలీసులు దర్యాప్తు కొనసాగిస్తున్నారు. రెండు రోజుల కస్టడీ విచారణ ముగిసిన నేపథ్యంలో, నిందితుడు ప్రశ్నలకు సమాధానం చెప్పకపోవడంతో పోలీసులు మరోసారి కస్టడీకి అనుమతి కోరుతూ ఉప్పరపల్లి కోర్టులో పిటిషన్ దాఖలు చేశారు.

అత్తాపూర్ పోలీస్ స్టేషన్‌లో రెండు రోజుల పాటు అధికారులు ఉదయ్ కృష్ణారెడ్డిని తీవ్రంగా ప్రశ్నించారు. మొదటి రోజు హైదరాబాద్ సిటీ పోలీస్ కమిషనర్ సజ్జనార్ స్వయంగా విచారణలో పాల్గొని, కీలక వివరాలపై ప్రశ్నలు సంధించారు. అయితే, నిందితుడు చాలా ప్రశ్నలకు సమాధానమివ్వడానికి నిరాకరించాడని పోలీసులు తెలిపారు.

లైంగిక వేదింపుల ఆరోపణలపై నమోదైన కేసులో ఉదయ్ కృష్ణారెడ్డిని గతంలో అరెస్టు చేశారు. కస్టడీలో అతని నుంచి సమాచారం రాబట్టేందుకు పోలీసులు ప్రయత్నాలు చేస్తున్నారు. నిందితుడి మౌనంతో దర్యాప్తు ముందుకు సాగకపోవడంతో, మరింత విచారణ అవసరమని పోలీసులు వాదిస్తున్నారు.

పోలీసులు దాఖలు చేసిన తాజా కస్టడీ పిటిషన్‌పై ఉప్పరపల్లి కోర్టు ఇవాళ విచారణ చేపట్టే అవకాశం ఉంది. కేసు సున్నితమైనది కావడంతో అధికారులు వివరాలు బయటకు పొక్కకుండా జాగ్రత్తలు తీసుకుంటున్నారు.