హార్ముజ్ జలసంధిలో ఇరాన్ దాడి: భారత నావికుడు మృతి, 10 మంది గాయపడ్డారు

హార్ముజ్ జలసంధిలో ఇరాన్ చేపట్టిన క్షిపణి దాడిలో ఒక భారతీయ నావికుడు మృతి చెందాడు. మరో 10 మంది భారతీయులు గాయపడ్డారు.

UAE కు చెందిన ‘యాంటీ మంబసా’, ‘యాంటీ ఆల్బహియా’ అనే రెండు చమురు ట్యాంకర్లపై ఇరాన్ రెండు క్రూజ్ క్షిపణులతో దాడి చేసిందని భారత రక్షణ శాఖ వెల్లడించింది. ఈ రెండు నౌకల్లో మొత్తం 46 మంది సిబ్బంది ఉన్నారు. వీరిలో 30 మంది భారతీయులు. ‘యాంటీ ఆల్బహియా’ లో 12 మంది భారతీయులు ఉండగా, ఒకరు మృతి చెందారు, మరొకరికి గాయాలయ్యాయి. ‘యాంటీ మంబసా’ లో 18 మంది భారతీయులుండగా, 9 మంది గాయపడ్డారు. ఈ నౌకలోని ఇద్దరు ఉక్రెయిన్ నావికులు కూడా గాయపడ్డారు.

ఈ ఘటనపై భారత్ తీవ్ర నిరసన వ్యక్తం చేసింది. విదేశాంగ శాఖ (MEA) ఢిల్లీలోని ఇరాన్ ఎంబసీ డిప్యూటీ చీఫ్ ఆఫ్ మిషన్ ను పిలిపించి, వాణిజ్య నౌకలపై దాడులు వెంటనే నిలిపివేయాలని డిమాండ్ చేసింది. పశ్చిమాసియాలో హింస పెరగడంపై ఆందోళన వ్యక్తం చేసిన MEA, ప్రాంతీయ శాంతి కోసం చర్చలు, దౌత్యం ద్వారా సమస్యల పరిష్కారానికి పిలుపునిచ్చింది. అంతర్జాతీయ జలమార్గాల్లో రవాణా స్వేచ్ఛను నొక్కి చెప్పింది.

దాడిని సమర్థిస్తూ ఇరాన్ వైఖరి. యాంటీ మంబసా, ఆల్బహియా నౌకలు తమ నావిగేషన్ వ్యవస్థలను జామ్ చేశాయని, హెచ్చరికలు పట్టించుకోకుండా మైన్ ఫీల్డ్ లోకి ప్రవేశించాయని ఇరాన్ ఆరోపించింది. అమెరికా సాయుధ దళాల మాయమాటలు నమ్మి వెళ్లినందుకే వాటిని నిర్వీర్యం చేసినట్లు పేర్కొంది.

ఇరాన్ పై ఫిబ్రవరి 28న అమెరికా, ఇజ్రాయిల్ సంయుక్త దాడులతో పశ్చిమాసియా సంఘర్షణ మొదలైంది. ఇప్పటివరకు మొత్తం 14 మంది భారతీయులు ఈ సంఘర్షణలో ప్రాణాలు కోల్పోయారు. ఈ నెల 12న సైప్రస్ పతాకంతో ప్రయాణిస్తున్న ‘BFS గాలక్సీ’ నౌకపై ఇరాన్ దాడిలో ఒక భారత నావికుడు గల్లంతయ్యాడు. అదనంగా, హార్ముజ్ పశ్చిమాన ఏడు భారత జెండా నౌకలు 148 మంది నావికులతో నిలిచిపోయాయని కేంద్ర ప్రభుత్వం తెలిపింది.