ఇరాన్ షిప్పింగ్పై అమెరికా పూర్తి నిషేధం: 20% హార్ముజ్ టోల్ ప్లాన్ వెనక్కి

అమెరికా అధ్యక్షుడు డొనాల్డ్ ట్రంప్ ఇరాన్ నౌకలపై పూర్తి నిషేధం విధిస్తూ కీలక ప్రకటన చేశారు. ఇక నుంచి ఇరాన్ పోర్టులకు వెళ్లే, అక్కడి నుంచి వచ్చే నౌకలతో పాటు ఇరాన్ సరుకు రవాణా చేస్తున్న ఓడలన్నింటినీ అడ్డుకుంటామని స్పష్టం చేశారు. అయితే హార్ముజ్ జలసంధి మిగిలిన అంతర్జాతీయ నౌకలకు పూర్తిగా తెరిచే ఉంటుందని, అమెరికా నౌకాదళం ఈ కీలక సముద్ర మార్గాన్ని సురక్షితంగా ఉంచుతోందని ఆయన పేర్కొన్నారు. రక్షణ మంత్రి పీట్ హెక్సెత్, జాయింట్ చీఫ్స్, సైనిక సిబ్బంది పాత్రను కూడా ట్రంప్ ప్రశంసించారు.

ట్రంప్ మరో కీలక నిర్ణయం తీసుకుంటూ, హార్ముజ్ జలసంధి గుండా వెళ్లే నౌకలపై 20 శాతం టోల్ విధించాలన్న ప్రణాళికను వెనక్కి తీసుకున్నారు. ఈ టోల్ స్థానంలో గల్ఫ్ దేశాల నుంచి భారీ పెట్టుబడులు వస్తాయని, వాణిజ్య ఒప్పందాలు జరుగుతాయని వివరించారు. ఈ పెట్టుబడులు అమెరికాలో తయారీ రంగాన్ని బలోపేతం చేస్తాయని, లక్షలాది అధిక జీతాల ఉద్యోగాలు వస్తాయని ట్రంప్ చెప్పారు. మధ్యప్రాచ్య భాగస్వాములతో మాట్లాడిన తర్వాత ఈ నిర్ణయం తీసుకున్నట్లు పేర్కొంటూ, తాను కేవలం పద్ధతి మార్చానని, అమెరికాకు నిధులు, ఉద్యోగాలు తీసుకురావడమే లక్ష్యమని స్పష్టం చేశారు.

ఇరాన్ విషయంలో తన వైఖరి మరింత కఠినం చేస్తూ, ఇరాన్ ఎప్పటికీ అణ్వాయుధం సాధించనివ్వబోమని ట్రంప్ హెచ్చరించారు. ఇరాన్ నాయకత్వం దేశాన్ని పూర్తి వినాశనం వైపు నడిపిస్తోందని ఆరోపించారు. గతంలో ఇరాన్ ఒప్పందానికి అంగీకరించి, తిరిగి చర్చలకు దిగడాన్ని ప్రస్తావిస్తూ, ఇరాన్ తన ఓపికను పరీక్షిస్తోందని విమర్శించారు. ప్రపంచ చమురు రవాణాలో కీలకమైన హార్ముజ్ జలసంధి ఇప్పటికీ అందరికీ అందుబాటులో ఉంటుందని, అయితే ఇరాన్ మాత్రం దీని వల్ల తీవ్రంగా నష్టపోతుందని నిపుణులు అంచనా వేస్తున్నారు.