అమెరికాతో చర్చలపై ఇరాన్ స్పీకర్ వ్యాఖ్యలు: 'విశ్వసనీయత లేని శత్రువుతోనే చర్చలు'

అమెరికాతో చర్చలు జరుపుతున్నది విశ్వసనీయత లేని శత్రువుతోనేనని ఇరాన్ పార్లమెంట్ స్పీకర్ మహమ్మద్ బాగ్యర్ గాలిబాఫ్ వ్యాఖ్యానించారు. ఇది ఒక మిత్రదేశంతో చర్చలు కాదని, శత్రుత్వానికి ముగింపు పలకాలంటే అమెరికా కీలక హామీలు నెరవేర్చాలని ఆయన తేల్చి చెప్పారు.

ప్రస్తుతం ఇరు దేశాల మధ్య కుదిరిన అవగాహన ఒప్పందం అమలుపైనే దృష్టి పెట్టినట్లు ఆయన వివరించారు. కొత్తగా ఎలాంటి చర్చలు జరగడం లేదని స్పష్టం చేశారు. సముద్ర మార్గాల్లో ఉద్రిక్తతలు తగ్గించడం, ఇరాన్ నిధులపై ఆంక్షలు ఎత్తివేయడం వంటి షరతులు అమెరికా నెరవేరిస్తేనే తుది ఒప్పందం సాధ్యమవుతుందన్నారు.

ఈ ఒప్పందం లెబనాన్ సార్వభౌమాధికారాన్ని కాపాడుతుందని, స్విట్జర్లాండ్ చర్చల తర్వాత లెబనాన్‌పై దాడులు తగ్గాయని గాలిబాఫ్ అన్నారు. హార్మూస్ జలసంధిపై ఇరాన్, ఒమన్లకు మాత్రమే సార్వభౌమాధికారం ఉందని, ఒప్పందం ప్రకారం 60 రోజుల పాటు ఎలాంటి చార్జీలు లేకుండా నౌకలను అనుమతిస్తామని ఆయన వివరించారు. అవసరమైతే యుద్ధానికి సిద్ధమేనని కూడా హెచ్చరించారు.