హార్ముజ్ MOU ఉల్లంఘన: ఇరాన్ నుంచి అమెరికా, ఇజ్రాయెల్‌కు తాఖీదు

ఐక్యరాజ్య సమితి భద్రతా మండలిలో ఇరాన్ తీవ్ర హెచ్చరికలు చేసింది. హార్ముజ్ జలసంధిలో నౌకాయాన నియంత్రణకు సంబంధించిన ఇస్లామాబాద్ అవగాహన ఒప్పందం (MOU) ను అమెరికా, ఇజ్రాయెల్ ఉల్లంఘిస్తున్నాయని, అనవసరంగా ఉద్రిక్తతలు పెంచుతున్నాయని ఆరోపించింది.

సోమవారం జరిగిన సమావేశంలో ఇరాన్ రాయబారి మాట్లాడుతూ, అమెరికా తన చట్టవిరుద్ధ చర్యల వల్ల ఏర్పడే అన్ని అంతర్జాతీయ చట్టపరమైన, రాజకీయ పరిణామాలకు పూర్తి బాధ్యత వహించాలని అన్నారు. ఒప్పందం ప్రకారం హార్ముజ్ జలసంధి ద్వారా సముద్ర రవాణా భద్రత, తిరిగి తెరవడం, అవసరమైన డీమైనింగ్ ఆపరేషన్ల బాధ్యత పూర్తిగా ఇరాన్‌దేనని తేల్చిచెప్పారు.

'బయటి శక్తులు ఈ వ్యవహారంలో జోక్యం చేసుకోవడం లేదా సమాంతర ఏర్పాట్లు చేయడం MOU ను ఉల్లంఘించడమే కాకుండా, సాధారణ వాణిజ్య నౌకాయాన పునరుద్ధరణను ఆలస్యం చేస్తుంది, సముద్ర భద్రతకు ముప్పు కలిగిస్తుంది, ప్రాంతీయ ఉద్రిక్తతలను పెంచుతుంది' అని హెచ్చరించారు.

అంతర్జాతీయ ఒప్పందాలను అమెరికా నిరంతరం ఉల్లంఘిస్తున్న నేపథ్యంలో, శాంతి భద్రతల పరిరక్షణకు UN సెక్రటరీ జనరల్, భద్రతా మండలి చురుకైన చర్యలు తీసుకోవాలని ఇరాన్ డిమాండ్ చేసింది. అమెరికా దురాక్రమణను ఆపడానికి 'సమర్థవంతమైన, నిర్ణయాత్మక చర్యలు' అవసరమని పేర్కొంది. అంతర్జాతీయ చట్టాల ఉల్లంఘనకు అమెరికాను జవాబుదారీగా చేయాలని కోరింది.

అయితే, అమెరికా ఒప్పంద బాధ్యతలను పూర్తిగా పాటించినట్లయితే ఇరాన్ కూడా MOU కట్టుబడి ఉంటుందని స్పష్టం చేసింది. 'ఒకవేళ అమెరికా MOU కింద తన బాధ్యతలను ఉల్లంఘిస్తూ ఉంటే, ఇరాన్ ఇకపై తన బాధ్యతలకు కట్టుబడి ఉండదు' అని రాయబారి హెచ్చరించారు.

ప్రపంచ ముడి చమురు సరఫరాలో ఐదో వంతు హార్ముజ్ జలసంధి ద్వారా రవాణా అవుతుంది. ఇక్కడ ఏమైనా అంతరాయం ఏర్పడితే ప్రపంచ ఆర్థిక వ్యవస్థపై తీవ్ర ప్రభావం పడుతుంది.