అర్ధరాత్రి ఆసుపత్రిలో చంటి బిడ్డతో ఒంటరిగా వచ్చిన తల్లికి జగ్గారెడ్డి సాయం

అర్ధరాత్రి సమయంలో ప్రభుత్వ ఆసుపత్రిలో చంటి బిడ్డతో ఒంటరిగా నిలిచిన ఓ తల్లికి ఎమ్మెల్యే జగ్గారెడ్డి సాయం అందించారు. సంగారెడ్డి జిల్లాలోని ప్రభుత్వ ఆసుపత్రికి బిడ్డకు ఫిట్స్ రావడంతో ప్రవలి అనే తల్లి అర్ధరాత్రి చేరుకుంది. భర్త అందుబాటులో లేని కారణంగా ఆమె తీవ్ర ఆందోళనకు గురైంది.

అదే సమయంలో ఆసుపత్రికి వచ్చిన జగ్గారెడ్డి, చంటి బిడ్డతో ఆందోళనగా ఉన్న ఆ తల్లిని గమనించారు. వెంటనే ఆమె సమస్య అడిగి తెలుసుకున్నారు. తన కారులో ఆ తల్లీబిడ్డలను ఎంసీహెచ్ (తల్లి, పిల్లల ఆరోగ్య కేంద్రం) కు తీసుకెళ్లారు.

అక్కడ వైద్యులతో మాట్లాడి అత్యవసర చికిత్స అందించేలా చర్యలు తీసుకున్నారు. వైద్యులు పరీక్షించగా, వ్యాక్సిన్ తర్వాత ప్రతికూల ప్రభావంగా పాపకు ఫిట్స్ వచ్చినట్లు గుర్తించారు. ప్రస్తుతం చిన్నారికి చికిత్స కొనసాగుతోంది.