పత్తి పంటలో మొదటి దశ కలుపు నివారణపై జమ్మికుంట KVK సూచనలు

రాష్ట్రంలో చాలా మంది రైతులు పత్తి విత్తనాలు విత్తారు. కొన్ని చోట్ల ఆలస్యంగా విత్తడం, గ్యాప్ ఫిల్లింగ్ కొనసాగుతోంది. ప్రస్తుతం పంట 10 నుంచి 40 రోజుల దశలో ఉంది. అక్కడక్కడ కురుస్తున్న వర్షాలతో కలుపు మొక్కలు పెరిగి పంట ఎదుగుదలకు అవరోధంగా మారుతున్నాయి.

ఈ నేపథ్యంలో జమ్మికుంట కృషి విజ్ఞాన కేంద్రం (KVK) శాస్త్రవేత్త విజయ్ రైతులకు సమగ్ర కలుపు యాజమాన్యం చేపట్టాలని సూచించారు. తొలి దశలో విత్తిన 24 నుంచి 48 గంటల లోపు పెండిమిథాలిన్ (Pendimethalin) 1.2–1.6 లీటర్లు 200 లీటర్ల నీటిలో కలిపి ఎకరానికి పిచికారీ చేయాలన్నారు. ఇప్పటికే 20–30 రోజుల పంట దశలో ఉన్న పొలాల్లో కలుపు 2–4 ఆకుల దశలో ఉన్నప్పుడు సిఫారసు చేసిన కలుపు మందులను మాత్రమే వాడాలని స్పష్టం చేశారు.

గడ్డి, తుంగజాతి కలుపుల నియంత్రణకు క్విజాలోఫాప్-ఇథైల్ (Quizalofop-ethyl) 400 ml ఎకరానికి 200 లీటర్ల నీటిలో కలిపి పిచికారీ చేయాలి. అలాగే ప్రొపాక్విజాఫాప్ + పైరిథయోబ్యాక్ సోడియం (Propaquizafop + Pyrithiobac sodium) మిశ్రమాన్ని 400–500 ml వాడాలని సూచించారు. మార్కెట్లో లభించే 'లిక్విడ్ మ్యాచ్' అనే ఉత్పత్తి ఇదేనని తెలిపారు. సిఫారసు చేయని, పూర్తి వివరాలు తెలియని మందులు వాడితే కలుపు నిర్మూలన సరిగా జరగకపోవడంతో పాటు పంటకు నష్టం వాటిల్లే ప్రమాదం ఉందని హెచ్చరించారు.

ఇటీవలి వర్షాలతో నల్లరేగడి నేలల్లో నీరు నిల్వ ఉండడంతో మొక్కలు పసుపుపచ్చగా మారుతున్నాయి. అటువంటి చోట్ల కాల్వలు ఏర్పాటు చేసి నీటిని బయటకు పంపాలని సూచించారు. జూలై 15 లోపు పత్తి విత్తనాలు పూర్తి చేయాలని, లేకుంటే దిగుబడి తగ్గే అవకాశం ఉందని అన్నారు. వర్షాధారంగా ఆలస్యంగా విత్తే రైతులు బెడ్ పద్ధతిలో విత్తుకోవాలని, ఎత్తైన ప్రదేశాల్లో బెడ్ మీద విత్తడం వల్ల నీటి నిల్వ, ఎద్దడి రెండింటి నుంచి రక్షణ లభిస్తుందని వివరించారు.